އާމިނަތު މަމްޝޫޤާ ވ. ޓަރކިޝް އެއަރލައިންސް އިންކް

ނަތީޖާ: އިސްތިއުނާފު ބާޠިލް، ވަޒީފާއާބެހޭ ޓްރައިބިއުނަލުގެ ނިންމުން ޤާއިމް

ކީވޯޑުތައް: ވަޒީފާއާބެހޭ، ވަޒީފާ އިޢާދަކުރުން

ދަށު ކޯޓު: ވަޒީފާއާބެހޭ ޓްރައިބިއުނަލް 61/VTR/2020

ކޯޓުން ނިންމަން ޖެހުނު ސުވާލު

އިންސާފުނުވާ ގޮތަކަށް ވަޒީފާއިން ވަކިކުރިކަމަށް ކަނޑައެޅުމަށްފަހު، ވަޒީފާދޭ ފަރާތާއި މުވައްޒަފާ ދެމެދު އިތުބާރު ގެއްލިފައިވާތީ ވަޒީފާ އިޢާދަނުކޮށް ބަދަލު ދިނުމަށް ވަޒީފާއާބެހޭ ޓްރައިބިއުނަލުން ނިންމި ނިންމުމަކީ ޤާނޫނީ ހަމަތަކާ އެއްގޮތް ނިންމުމެއްތޯ.

ޚުލާޞާ

ވާޤިޢާ: އެއަރލައިންއެއްގައި މާކެޓިންގ ރެޕްރެޒެންޓޭޓިވްގެ ވަޒީފާ އަދާކުރަމުން އައި މުވައްޒަފަކަށް 2 މަސްދުވަހުގެ ނޯޓިސް ދީ ވަޒީފާއިން ވަކިކުރުމުން، ވަޒީފާ އިޢާދަކޮށް ގެއްލުމުގެ ބަދަލު ހޯދުމަށް ޓްރައިބިއުނަލަށް ހުށަހެޅިއެވެ.

ދަށު ކޯޓުގެ ނިންމުން: ޓްރައިބިއުނަލުން މައުޟޫޢީ އަދި އިޖުރާއީ ޢަދުލުވެރިކަން ޤާއިމްނުކުރާތީ އިންސާފުނުވާ ވަކިކުރުމެއްކަމަށް ކަނޑައެޅި ނަމަވެސް، ދެފަރާތުގެ މެދުގައި އިތުބާރު ގެއްލިފައިވާތީ ވަޒީފާ އިޢާދަނުކޮށް، 29 (ރ) ގެ ދަށުން 8 މަހުގެ މުސާރަ USD 17,570.08 ބަދަލުގެ ގޮތުގައި ދިނުމަށް ނިންމިއެވެ.

ޚަޞްމުންގެ ހުށަހެޅުންތައް: މުވައްޒަފު ބުނީ އިތުބާރު ގެއްލުނުކަމަށް ބުނި ސަބަބުތަކަކީ ޖަވާބުދާރީވުމުގެ ފުރުޞަތު ނުލިބޭ، ވަކިކުރި ސަބަބާ ނުގުޅޭ، ފަހުގެ ލިޔެކިޔުމަށް ބިނާކުރި ސަބަބުތަކެއްކަމަށެވެ. ކުންފުނިން ބުނީ އިތުބާރު ގެއްލުނީ ހެއްކާއެކު ހަރުދަނާ ސަބަބުތަކެއްގެ މައްޗަށް ކަމަށާއި ނިންމުން ޚިލާފުވާ ޤާނޫނީ ހަމައެއް ބުނެދީފައި ނުވާކަމަށެވެ.

ކޯޓުގެ ސަބަބުތައް: ޓްރައިބިއުނަލުން އިތުބާރު ގެއްލުނުކަމަށް ކަނޑައެޅީ ހުށަހެޅި ހެކި (ޔުނިފޯމް ނާޅާނެކަމަށް ފޮނުވި މެއިލް، ފަރުވާކުޑަކަން، ތިންވަނަ ފަރާތަކާ ބޭއަދަބީ ބަސް ބޭނުންކޮށް ހިއްސާކުރި ޗެޓް ލޮގު) އަށް ރިޢާޔަތްކޮށްގެން ކަމާއި، އެ ހެކިތަކާ ދެކޮޅު ނުކުތާއެއް އިސްތިއުނާފުގައި ނެތުމާއި، ނިންމުން ޚިލާފުވާ ޤާނޫނީ ހަމައެއް ނުދައްކާތީ ނިންމުން ޤާއިމްކުރިއެވެ.

ކަނޑައެޅި ޤާނޫނީ އުޞޫލުތައް

1. ވަޒީފާއާބެހޭ ޤާނޫނުގެ 29 ވަނަ މާއްދާގެ (ހ) ގެ ދަށުން އެކަށީގެންވާ ސަބަބެއް ނެތި ވަޒީފާއިން ވަކިކުރިކަން ސާބިތުވާ ޙާލަތުގައި ދެވިދާނެ އެންމެ އަސާސީ ޙައްލަކީ ވަޒީފާ އިޢާދަކުރުން ނުވަތަ އެކަށީގެންވާ ވަޒީފާއެއްގައި ބެހެއްޓުމެވެ؛ ނަމަވެސް 29 ވަނަ މާއްދާގެ (ށ) ގެ ދަށުން ވަކިކުރުމަށް މުވައްޒަފު ބައިވެރިވި މިންވަރަށް ރިޢާޔަތްކުރަންޖެހެއެވެ. (ޕެރ. 11)
2. ވަޒީފާ އިޢާދަކުރުމަކީ އިސްތިސްނާއެއް ނެތި އޮންނަ ކަމެއް ނޫނެވެ. ވަޒީފާ އަނބުރާ އިޢާދަނުކުރެވޭ މިންވަރަށް ވަޒީފާދޭ ފަރާތާއި މުވައްޒަފާ ދެމެދު އިތުބާރު ގެއްލިފައިވުމަކީ އިޢާދަކުރުމަށް ހުރަސްއަޅާ ޙާލަތެކެވެ؛ އިޢާދަކުރާނީތޯ ބަދަލު ދޭނީތޯ ކަނޑައަޅަންވާނީ މައްސަލައިގެ ޚާއްޞަ ޙާލަތުތައް ވަޒަންކޮށްގެންނެވެ. (ޕެރ. 12)
3. އިތުބާރު ގެއްލިފައިވާކަމަށް ވަޒީފާދޭ ފަރާތުން ހަމައެކަނި ބުނުމުން ނުފުދޭނެއެވެ؛ އެއީ ހަރުދަނާ ސަބަބުތަކެއްގެ މައްޗަށް ބިނާކޮށް ބުނާ ބުނުމެއްތޯ ބަލަންވާނެއެވެ. އަލުން ވަޒީފާ ދިނުމަށް ވަޒީފާދޭ ފަރާތް ފަސްޖެހުމަކީ އިޢާދަނުކުރުމަށް މަޤުބޫލު ސަބަބެއް ނޫނެވެ. (ޕެރ. 12، 18)
4. ވަޒީފާއިން ވަކިކުރުމަށްފަހު މުވައްޒަފު ކުރާ ޢަމަލުތަކުގެ ސަބަބުންވެސް ދެފަރާތުގެ މެދުގައި އިތުބާރު ގެއްލިދާނެ ޙާލަތެއް މެދުވެރިވެދާނެއެވެ. (ޕެރ. 13)
5. ޓްރައިބިއުނަލަށް ހުށަހެޅި، ދެފަރާތަށް ވާހަކަ ދެއްކުމުގެ ފުރުޞަތު ލިބުނު ހެކިތަކަށް ރިޢާޔަތްކޮށް އިތުބާރު ގެއްލިފައިވާކަމަށް ކަނޑައަޅާފައިވާއިރު، އެ ނިންމުން ޚިލާފުވާ ޤާނޫނީ ހަމައެއް އިސްތިއުނާފުކުރާ ފަރާތުން ބުނެދީފައި ނުވާނަމަ، ވަޒީފާ އިޢާދަނުކުރުމަށް ނިންމި ނިންމުމަށް ބަދަލު ގެނައުމުގެ ސަބަބެއް ނެތެވެ. (ޕެރ. 16-18)

ބަލާފައިވާ ޤާނޫނުތައް

• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 29 ވަނަ މާއްދާގެ (ހ) އަދި (ށ)
• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 29 ވަނަ މާއްދާގެ (ރ) (ޓްރައިބިއުނަލުން ބަދަލު ކަނޑައެޅި)
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާގެ (ހ)، (ށ)، (ނ) (އިސްތިއުނާފުގެ އިޖުރާއަތު)
• A/37-2021/SC (މޯލްޑިވްސް ޕޯޓްސް ލިމިޓެޑް ވ. އިބްރާހީމް ފައިޞަލް)
• A/49-2018/SC (މޯލްޑިވްސް އެއާޕޯޓްސް ކޮމްޕެނީ ލިމިޓެޑް ވ. ޖާބިރު ޢަބްދުއްރަޙްމާން)
• 36,37,38/A-2018/SC (ކްރައުން ކޮމްޕެނީ ޕްރައިވެޓް ލިމިޓެޑް ވ. ޢަބްދުﷲ އާނިސް އަދި އިތުރު 21 ފަރާތެއް)