ފާޠިމަތު ފަރީދާ އަދި އިތުރު ފަރާތްތައް ވ. މުޙައްމަދު އަނީސް

ނަތީޖާ: އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަށު ކޯޓު: ސިވިލް ކޯޓު 2974/Cv-C/2021

ކޯޓުން ނިންމަން ޖެހުނު ސުވާލު

"ތަކެތި ނުވަތަ އޭގެ އަގު" ދިނުމަށް ކޮށްފައިވާ ޙުކުމެއް ތަންފީޛުކުރުމުގައި، ތަކެތި ވުޖޫދުގައި ނެތުމުން، މައުޟޫޢީ މައްސަލައިގެ ދަޢުވާފޯމުގައިވާ އަގުތަކަށް ބަލައި ތަކެތީގެ އަގު ކަނޑައެޅުމަކީ ތަންފީޛީ ޤަޟިއްޔާގެ ތަރަހައިން ބޭރުން ކުރެވުނު ކަމެއްތޯ، އަދި އަގާމެދު ބަސްބުނުމުގެ ފުރުޞަތު ލިބުނުތޯ.

ކަނޑައެޅި ޤާނޫނީ އުޞޫލުތައް

1. މައުޟޫޢީ މައްސަލަ ތިން މަރުޙަލާއިން ނިމި ތަންފީޛުކުރެވޭ ޙާލަތުގައިވެސް، ތަންފީޛީ ޤަޟިއްޔާގެ ތެރޭގައި މައުޟޫޢު އަލުން ހުޅުވައި މައުޟޫޢީ މައްސަލައިގައި ނިމިފައިވާ ކަންކަމަށް އުނިއިތުރު ނުގެނެވޭނެއެވެ. (ޕެރ. 18)
2. "ތަކެތި ނުވަތަ އޭގެ އަގު" ދިނުމަށް ކޮށްފައިވާ ޙުކުމެއް ތަންފީޛުކުރުމަށްޓަކައި އަގު ކަނޑައެޅުމަކީ ތަންފީޛީ ޤަޟިއްޔާގެ ތަރަހައިގެ ތެރެއިން ކުރެވޭނެ ކަމެއްތޯ ބެލުމުގައި ބަލަންޖެހޭ މުހިއްމު ކަމަކީ ތަކެތީގެ އަގާމެދު ޚުޞޫމަތެއް އުފެދިފައިވޭތޯއެވެ. (ޕެރ. 19)
3. ތަކެތި ވުޖޫދުގައި ނެތްކަމަށް ދަރަނިވެރިން އެއްބަސްވާ ޙާލަތުގައި ބާޒާރުން ތަކެތި ގަނެ ޙަވާލުކުރުމަކީ ޙުކުމުގައި ކަނޑައަޅާފައިވާ ގޮތެއް ނޫނެވެ. (ޕެރ. 27)
4. މައުޟޫޢީ މައްސަލައިގެ ހުރިހާ މަރުޙަލާއެއްގައި ވެސް ދަޢުވާފޯމުގައިވާ ތަކެތީގެ އަގާމެދު ޚުޞޫމަތެއް އުފައްދާފައި ނުވާއިރު، މައުޟޫޢީ ޤަޟިއްޔާގައި ހުށަހެޅިފައިވާ އަގަށް ރިޢާޔަތްކޮށް ތަންފީޛީ ޤަޟިއްޔާގައި ތަކެތީގެ އަގު ކަނޑައެޅުމަކީ ޙުކުމް ތަންފީޛުކުރުމުގެ ޤަޟިއްޔާގެ ތަރަހައިން ބޭރުން ކުރެވޭ ކަމެއް ނޫނެވެ. (ޕެރ. 20-22، 28-29)
5. ތަންފީޛީ ޤަޟިއްޔާގެ އަޑުއެހުންތަކުގައި ތަކެތީގެ އަގާމެދު ދެފަރާތަށް ބަސްބުނުމުގެ ފުރުޞަތު ދީފައިވާއިރު އެ އަގަށް ތަޢުނެއް ނުކުރާނަމަ، އަގާމެދު ބަސްބުނުމުގެ ފުރުޞަތު ލިބިފައިވާކަމަށް ބެލެވޭނެއެވެ. (ޕެރ. 23-26، 29)

ބަލާފައިވާ ޤާނޫނުތައް

• ސުޕްރީމް ކޯޓުގެ 2019/SC-A/32 (އެޓަރނީ ޖެނެރަލްގެ އޮފީސް vs އަޙްމަދު ސިޔާމް) ޤަޟިއްޔާ
• ސުޕްރީމް ކޯޓުގެ 2019/SC-A/07 (ދައުލަތް (މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ) vs މަޢުރޫފާ އަބޫބަކުރު) ޤަޟިއްޔާ
• ސުޕްރީމް ކޯޓުގެ 2021/SC-A/48 (ސްޓޭޓް ބޭންކް އޮފް އިންޑިޔާ vs އަތަމާ އިންވެސްޓްމަންޓްސް ޕްރައިވެޓް ލިމިޓެޑް އަދި އިތުރު ފަރާތްތައް) ޤަޟިއްޔާ
• ހައިކޯޓުގެ 2015/HC-A/85 ޤަޟިއްޔާ އަދި ސުޕްރީމް ކޯޓުގެ 2018/SC-A/56 ޤަޟިއްޔާ (މައުޟޫޢީ މައްސަލައިގެ އިސްތިއުނާފުތައް)
• ސުޕްރީމް ކޯޓުގެ ނަންބަރު 2015/03/SC ސަރކިއުލަރ (ތަންފީޛީ މައްސަލަ ކޯޓުގެ އިސްނެގުމުން ކުރިއަށް ގެންދިއުން)