—

ކޯޓު އަމުރަކީ މުޅި ގެސްޓްހައުސް ބަލައި ފާސްކުރުމަށް ދޫކޮށްފައިވާ އަމުރަކަށްވާއިރު، ގެސްޓް ހައުސްގެ ކޮންމެ ކޮޓަރިއަކަށް ވަނުމުގެ ކުރިން ކޯޓު އަމުރު ދެއްކުން ލާޒިމްނޫނެވެ. ގެސްޓް ހައުސްގެ ކައުންޓަރުގައި އިންނަ ފަރާތަކީ ގެސްޓް ހައުސްގެ ކަންތައްތައް ބެލެހެއްޓުމުގެ ޒިންމާ ހަވާލުކޮށްފައިވާ ފަރާތަކަށް ވާހިނދު، އެ ފަރާތަށް ކޯޓު އަމުރު ދައްކައި އެތަން ބަލައި ފާސްކުރުމުގެ ކަންތައްތައް އަމުރުގައި ވާގޮތުގެ މަތިން ކުރިއަށް ގެންދިޔުމުގެ ޤާނޫނީ ބާރު ފުލުހުންނަށް ލިބިގެންވެއެވެ. (ޕެރ. 03 (ށ))

ޤާނޫނުއަސާސީގެ 46 ވަނަ މާއްދާގެ ދަށުން، މަނާކުރެވިފައިވާ މަސްތުވާއެއްޗެއް މީހެއްގެ އަތުގައި ހުރުމަކީ އިސްތިސްނާއެއް ނެތި މުޠްލަޤް މަސްއޫލިއްޔަތު އުފުލަންޖެހޭ ކުށެއްކަމަށްވެފައި، މީހަކު ހައްޔަރުކުރެވުނު ތަނުން ގިނަ ޢަދަދެއްގެ މަސްތުވާތަކެތި ފެނުމަކީ އޭނާ މަސްތުވާތަކެތި ޓްރެފިކްކުރަނީކަމަށް، ނުވަތަ ޓްރެފިކްކުރަން އުޅޭކަމަށް ބުއްދިއަށް ޤަބޫލުކުރެވޭ ފަދަ އެކަށީގެންވާ ސަބަބުތަކެއްކަމަށް ޤާނޫނީގޮތުން ބަލަންޖެހެއެވެ. އެޙާލަތުގައި ކުށެއްގެ ތުހުމަތުގައި މީހަކު ހައްޔަރުކުރުމަށް ކޯޓު އަމުރެއް އޮތުން ލާޒިމް ނޫނެވެ. (ޕެރ. 03 (ށ))

ހަމައެކަނި ފިޒިކަލް އެޕެއަރެންސްއަށް ބަލައި ތަޙުލީލުކުރެވޭ ތަކެތި އެގޮތަށް ތަޙުލީލުކުރެވުނު ސަބަބު ތަޙުލީލު ރިޕޯޓުގައި ބަޔާންކޮށް، ފޮޓޯ ރިޕޯޓެއް އެޓޭޗްކުރަން ޖެހޭ ނަމަވެސް، ފޮޓޯ ރިޕޯޓެއް އޮތުން ލާޒިމްވާނީ ހަމައެކަނި ފިޒިކަލް އެގްޒަމިނޭޝަންގެ މައްޗަށް ބުރަވެ ކެނެބިސްގެ ބާވަތް ދެނެގަނެފައިވާނަމައެވެ. މަސްތުވާތަކެތި ޖީސީއެމްއެސް މެތޮޑުން ތަޙުލީލުކޮށް، މެޝިން ރިޕޯޓު ތަޙުލީލު ރިޕޯޓާ އެޓޭޗްކުރެވިފައިވާނަމަ، ފޮޓޯ ރިޕޯޓެއް އޮތުމަކީ ކޮންމެހެން ފުރިހަމަވާންޖެހޭ ކަމެއް ނޫނެވެ. (ޕެރ. 03 (ނ))

އެކަކަށްވުރެ ގިނަ މީހުން ދިރިއުޅޭ ކޮޓަރިއެއްގެ ތެރެއިން މަސްތުވާތަކެތި ފެނިފައިވީނަމަވެސް، އިތުރު ހެއްކާއި ޤަރީނާއާ ނުލައި، އެކޮޓަރިއެއްގައި ދިރިއުޅޭ ފަރާތްތަކުގެ ތެރެއިން ވަކިމިވެނި މީހެއްގެ މައްޗަށް އެކަމުގެ ޒިންމާ ހަމައެކަނި އުފުލަންޖެހޭ ގޮތްވުމަށް ބިނާކުރާނެ ޝަރުޢީ އަދި ޤާނޫނީ އުޞޫލެއް ނެތްނަމަ، ވަކި މީހަކު އެތަނަކުން ފެންނަ އެއްޗަކަށް ޒިންމާނުކުރުވޭނެއެވެ. ނަމަވެސް މަސްތުވާތަކެތި ފެނުމުގެ އިތުރުން، އެތަކެއްޗަކީ ތުހުމަތުކުރެވޭ ފަރާތްތަކުގެ ކޮންޓްރޯލްގެ ދަށުގައި އެމީހުންނަށް އެނގިގެން އެތަނުގައި ހުރި ތަކެތިކަން ހާމަކޮށްދޭ ހެއްކާއި ޤަރީނާ ހުށަހަޅާފައިވާނަމަ، އެ އުޞޫލު ނުހިނގައެވެ. (ޕެރ. 03 (ރ))

މަސްތުވާތަކެއްޗާބެހޭ ޤާނޫނުގެ 141 ވަނަ މާއްދާ (އިޞްލާޙާއެކު 143 ވަނަ މާއްދާ) ގެ (ރ) އަދި (ޅ) ގައިވާ ގޮތުން، މީހެއްގެ ކޮންޓްރޯލްގައި ހުންނަ ތަނަކުން މަސްތުވާތަކެތި ފެނުމާއި، މީހެއްގެ އަތުގައި ހުރީކަމަށް މާނަކުރެވިދާނެ އެހެން ގޮތަކަށްވެސް މަސްތުވާތަކެތި ހުރެއްޖެކަމަށް ވާނަމަ، އެހެން ގޮތަކަށް ސާބިތުނުވާހާ ހިނދަކު މީހާގެ އަތުގައި މަސްތުވާއެއްޗެއް ހުރީކަމުގައި ބެލެވޭނެއެވެ. (ޕެރ. 03 (ރ))

މަނާކުރެވިފައިވާ މަސްތުވާއެއްޗެއް މީހެއްގެ އަތުގައި ހުރުމަކީ އިސްތިސްނާއެއްނެތި، މުޠްލަޤު މަސްއޫލިއްޔަތު އުފުލަން ޖެހޭ ކުށެކެވެ. މަސްތުވާތަކެއްޗާބެހޭ ޤާނޫނުގެ 17 ވަނަ މާއްދާއާއި 142 (144) ވަނަ މާއްދާއާއި 137 (139) ވަނަ މާއްދާގެ (ބ) އަށް ބެލުމުން 14 ގްރާމަށްވުރެ ގިނައިން މީހެއްގެ އަތުން ކެނެބިސް ފެނުމަކީ ކުށުގެ މަސްއޫލިއްޔަތު އުފުލުމަށް ފުދޭ ކާފީ ޤާނޫނީ ޤަރީނާއެކެވެ. (ޕެރ. 03 (ރ))

މަސްތުވާތަކެއްޗާބެހޭ ޤާނޫނުގެ 144 ވަނަ މާއްދާ (އިޞްލާޙާއެކު 146 ވަނަ މާއްދާ) ގައިވާ ގޮތުން، އެކަކަށްވުރެ ގިނަމީހުންނަށް އެނގިގެން، އެމީހުންގެ ރުހުމާއެކު، އޭގެތެރެއިން ވަކި މީހެއްގެ އަތުގައި މަސްތުވާތަކެތި ހުރެއްޖެނަމަ، އެއިން ކޮންމެ މީހެއްގެ އަތުގައި ވަކިވަކިން މަސްތުވާތަކެތި އެ ޢަދަދަށް ހުރީ ކަމުގައި ބެލެވޭނެއެވެ. މަސްތުވާތަކެތި އަތުގައި ހުރުމާއި ޓްރެފިކްކުރުމަކީ ތަފާތު ކުށްތަކެއް ކަމުން، ޓްރެފިކްކުރުމުގެ ކުށް ސާބިތުވުމަށްޓަކައި ކޮންމެހެން މަސްތުވާތަކެތި އަތުގައި ހުރުމުގެ ކުށް ސާބިތުވުން ލާޒިމެއް ނޫނެވެ. (ޕެރ. 03 (ބ))

ކޮންމެ މައްސަލައަކީ ތަފާތު ވާޤިޢާތަކެއްގެ މައްޗަށް ބިނާވާ މައްސަލައެކެވެ. ދެމީހަކު އެއްތަނެއްގައި އެއްވަގުތެއްގައި ތިބިނަމަވެސް، އެކަކުގެ ޙިޔާޒަތުގެ ދަށުގައި ހުރި މަސްތުވާތަކެތި އަނެއް މީހާގެ ބެލުމުގެ ދަށުގައި ނުވަތަ އޭނާއަށް އެނގިގެންކަމެއް ހެކިން ނޭނގޭނަމަ، އެ ތަކެތި އަނެކާގެ އަތުން ފެނުނީ ކަމަށް ނުބެލެވޭނެ ނަމަވެސް، ތަކެތި އެތަނުގައި ހުރީ ދެފަރާތަށް އެނގިގެން، އެފަރާތުގެ ރުހުމުގައިކަން އެނގެން އޮތްނަމަ އެ އުޞޫލު ނުހިނގައެވެ. (ޕެރ. 03 (ބ))