ޢަލީ ޔަސާރު ވ. ގްރޭޓަރ ގްރީން ޕްރައިވެޓް ލިމިޓެޑް

ޓްރައިބިއުނަލުން މައްސަލަ ނިންމާފައިވަނީ ޚަޞްމުންގެ ހެކިތަކަށް ނަޒަރުކޮށް، އެ މައްޗަށް ރިޢާޔަތްކޮށްގެންކަން މައްސަލަ ނިމުނު ގޮތުގެ ރިޕޯޓުން އެނގެންއޮތްނަމަ، ހެކިތަކަށް ރިޢާޔަތް ނުކޮށް ނިންމި ކަމަށް ބުނާ އިސްތިއުނާފީ ނުކުތާ ބަލައެއް ނުގަނެވެއެވެ. (ޕެރ. 9.2.3)

ހެކިވެރިއެއްގެ ޢަދުލުވެރިކަމާ ސުވާލު އުފައްދާއިރު، ޢަދުލުވެރިކަން ގެއްލެނީ ކޮން ސަބަބަކާ ހުރެތޯ ބަޔާންކުރަންޖެހެއެވެ. ހެކިވެރިޔަކީ ވަޒީފާދޭ ކުންފުނީގެ މެނޭޖިންގ ޑިރެކްޓަރަށް ވުމަކީ، އަދި މުވައްޒަފާ އެކު މަސައްކަތްކުރާ ހަމައެކަނި މީހާ ވުމަކީ، ހަމައެކަނި އެ ސަބަބަށް އޭނާގެ ހެކިބަސް ޝަރުޢީ ޤާނޫނީ ގޮތުން ބަލައިނުގަނެވޭނެ ސަބަބެއް ނޫނެވެ. (ޕެރ. 9.4.2)

ނޯޓިސް ނުދީ ވަޒީފާއިން ވަކިކުރެވޭނީ، މަސައްކަތުގެ އަޚްލާޤު އެކަށީގެން ނުވެ، އިތުރަށް ވަޒީފާގައި ބެހެއްޓުމަކީ އެކަށީގެންވާ ހަމަތަކަށް ބަލާއިރު ކުރެވޭނެ ކަމެއް ނޫން ކަމަށް ވަޒީފާދޭ ފަރާތަށް ފެންނަ ޙާލަތުގައި، ނުވަތަ ޚިޔާނާތެއް ވެފައިވާ ޙާލަތުގައެވެ. ފާޅުކަން ބޮޑު ޣައިރު ސުލޫކީ ޢަމަލަކަށް ވާނީ ވަޒީފާގެ ގުޅުން އެއްކޮށް ކެނޑޭ މިންވަރުގެ ސީރިއަސް ޢަމަލެކެވެ. އެ ސީރިއަސްކަން ވަޒީފާގެ ބާވަތާއި މަޤާމާއި މަސްއޫލިއްޔަތާއި އަމާނާތްތެރިކަމުގެ ޒިންމާއާ ލައިގެން ތަފާތުވެދާނެއެވެ. (ޕެރ. 9.6-9.7، 9.16)

ވަޒީފާގައި ބެހެއްޓުމުން ގެއްލުން ލިބިދާނެ ކަމަށް ވަޒީފާދޭ ފަރާތަށް ފެންނަ ފެނުން ބިނާވާންޖެހޭނީ އެކަށީގެންވާ ހަމައެއްގެ މައްޗަށެވެ. ވަކިކުރުމުގައި ޝަކްލީ އަދި އިޖުރާއީ ކަންކަމަށް ތަބާވެފައިވޭތޯ ޝަރީޢަތުން ކަށަވަރުކުރަންޖެހެއެވެ. މައުޟޫޢީ ޢަދުލުވެރިކަމަކީ ވަކިކުރި ސަބަބަކީ ޢަދުލުވެރި ނުވަތަ އެކަށީގެންވާ ސަބަބަކަށް ވުމެވެ؛ އިޖުރާއީ ޢަދުލުވެރިކަމަކީ ވަކިކުރުމުގައި ޢަމަލުކުރި އިޖުރާއަތަކީ ޢަދުލުވެރި އިޖުރާއަތަކަށް ވުމެވެ. (ޕެރ. 9.8-9.9)

އެކައުންޓިންގ ސިސްޓަމެއްގައި މުވައްޒަފެއްގެ ނަމުގައި ޤާއިމުކޮށްފައިވާ ޔޫސަރއިން ހަދާފައިވާ އެންޓްރީތަކަކީ، ޕާސްވޯޑު އެހެން ފަރާތަކާ ޙިއްޞާކޮށްފައިވާކަން ނުވަތަ އެހެން ފަރާތަކުން އެކްސެސްވިކަން ސާބިތުނުކުރާހާ ހިނދަކު، އެ މުވައްޒަފު ހަދާފައިވާ އެންޓްރީތައް ކަމަށް ބަލަންޖެހެއެވެ. ސާރވާ މެދުވެރިކޮށް ހިންގާ ސިސްޓަމެއްގެ ގަޑިއަކީ ސާރވާގެ ގަޑި ކަމަށް ބަލަންޖެހެއެވެ. (ޕެރ. 9.13-9.14)

ޖިނާއީ ކުށެއް ސާބިތުވާ މިންގަނޑަކީ (ޙައްދުގެ މައްސަލަތައް ފިޔަވައި) އެކަށީގެންވާ ޝައްކެއް ނެތި ސާބިތުވުމެވެ. މަދަނީ އަދި އިދާރީ ފިޔަވަޅެއް އެޅުމުގައި ކަމެއް ސާބިތުވާނީ ހެކި ވަޒަންކުރުމުން ބޮޑަށް ބުރަވެވޭ ގޮތުގެ (balance of probabilities) މައްޗަށެވެ. ޖިނާއީ ކުށެއްގެ ތުހުމަތުގައި 23 ވަނަ މާއްދާގެ ދަށުން ވަކިކުރާއިރުވެސް ބަލަންޖެހޭނީ މަދަނީ/އިދާރީ މިންގަނޑުންނެވެ؛ ޖިނާއީ މިންގަނޑަށް ކުށް ސާބިތުވޭތޯ ބަލަން ނުޖެހެއެވެ. (ޕެރ. 9.15)

ކުންފުނީގެ ހުރިހާ މާލީ މުޢާމަލާތެއް ބެލެހެއްޓުމުގެ ޙައްސާސް ޒިންމާ އަދާކުރާ މުވައްޒަފަކު ފައިސާއަށް އިހުމާލުވި ކަމަށް ތަޙްޤީޤުން ހޯދިފައިވާނަމަ، ޚިޔާނާތް ކަނޑައެޅިގެން ސާބިތުނުވިޔަސް، އޭނާ ވަޒީފާގައި ބެހެއްޓުމަކީ ކުރެވޭނެ ކަމެއް ނޫން ކަމަށް ނިންމުމަކީ އެކަށީގެންވާ ހަމައެކެވެ. (ޕެރ. 9.14، 9.16)

އިސްތިއުނާފީ ނުކުތާތަކުގައި އިޖުރާއީ ޢަދުލުވެރިކަމާ ގުޅޭ ޝަކުވާއެއް ހުށަހަޅާފައި ނުވާނަމަ، ހައިކޯޓުން ބަލަނީ މައުޟޫޢީ ޢަދުލުވެރިކަމާ ގުޅޭ ނުކުތާތަކަށެވެ. (ޕެރ. 9.10)