ދަ މައިންޑް އިން ކައުންޓަރ ވ. ދިވެހިރާއްޖޭގެ ޤައުމީ ޔުނިވަރސިޓީ

ނަތީޖާ: އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަށު ކޯޓު: ސިވިލް ކޯޓު 4398/Cv-C/2018

ކޯޓުން ނިންމަން ޖެހުނު ސުވާލު

ފޮތް ޕްރިންޓްކުރުމުގެ އެއްބަސްވުމުގައި ކަނޑައެޅި މުއްދަތުގައި މަސައްކަތް ނުނިންމާ އެއްބަސްވުން ބާޠިލްކުރުމުން، މަސައްކަތުގެ އަގާއި ގުދަނުގެ ކުލި ހޯދުމަށް ކުރި ދަޢުވާ ޘާބިތުނުވާ ކަމަށް ސިވިލް ކޯޓުން ނިންމުމުގައި އެއްބަސްވުމުގެ މާއްދާތަކާއި، މާލިއްޔަތު ޤަވާޢިދާއި، ހެކިބަހަށް ރިޢާޔަތްކޮށްފައި ނުވޭތޯ.

ކަނޑައެޅި ޤާނޫނީ އުޞޫލުތައް

1. ދަށުކޯޓުން ބައެއް ކަންކަމަށް ރިޢާޔަތްނުކުރި ކަމަށް ބުނެ އިސްތިއުނާފުކުރާއިރު، ދަށުކޯޓުން ރިޢާޔަތްކުރި ކަންކަމުގައި ޚިލާފުވި ޤާނޫނީ ނުވަތަ ޝަރުޢީ އަޞްލަކީ ކޮބައިކަން އިސްތިއުނާފުކުރާ ފަރާތުން ބުނެދޭންވާނެއެވެ. (ޕެރ. 9)
2. އެއްބަސްވުމުގައި މަސައްކަތް ނިންމުމަށް މުއްދަތު އިތުރުނުކުރެވޭނެ ކަމަށް ބުނެފައިވާނަމަ، ދުވަހަކަށް ކެނޑޭ ޖޫރިމަނާގެ މާއްދާ (އަދި އެ މާއްދާއިން ޙަވާލާދޭ މާލިއްޔަތު ޤަވާޢިދުގެ 8.29 އާއި 8.32) އަށް ރުޖޫޢަވާން ނުޖެހޭ ކަމުން، އެ ޤަވާޢިދަށް ރިޢާޔަތްކުރަންޖެހޭ ޙާލަތެއް މެދުވެރިވެފައެއް ނުވެއެވެ. (ޕެރ. 12)
3. ކޮންޓްރެކްޓަކީ އެ ކޮންޓްރެކްޓް ކުރާ ފަރާތްތަކުގެ ކަންކަން ނިންމަން އޮންނަ ޤާނޫނެވެ؛ ވަކި ކަމެއް ވަކި ގޮތަކަށް ނުވަތަ ވަކި މުއްދަތެއްގައި ކުރުމަށް ކަނޑައަޅާފައިވާނަމަ، ބައިވެރިން އެނޫން ގޮތަކަށް ލުއި ނުދޭހާ ހިނދަކު އެކަން ކުރަންވާނީ ކޮންޓްރެކްޓުގައި ބުނާ ގޮތަށެވެ. (ޕެރ. 17)
4. ވަކި ބޭނުމަކަށް ވަކި މުއްދަތެއްގެ ތެރޭގައި ނިންމަން ޙަވާލުކުރާ މަސައްކަތެއް އެ މުއްދަތުގައި ނުނިމުމުން މަސައްކަތުގެ މަޤްޞަދު ޙާޞިލުނުވެދާނެ ޙާލަތުގައި، މުއްދަތަށް މަސައްކަތް ނިންމުމަކީ އެއްބަސްވުމުގެ ޖައުހަރީ ކަމެކެވެ. (ޕެރ. 18)
5. އެއްބަސްވުމުގައި ކަނޑައެޅި މުއްދަތުގައި މަސައްކަތް ނިންމިކަމާއި، ލަސްވި ސަބަބު ލިޔުމުން އެންގިކަން ޘާބިތުނުކުރެވުނު ޙާލަތުގައި، މަސައްކަތުގެ އަގު ދައްކަންޖެހޭ ކަމަށް ބުނާ ދަޢުވާ ޘާބިތުނުވާ ކަމަށް ދަށުކޯޓުން ނިންމުމަކީ ޝަރުޢީ އަދި ޤާނޫނީ ގޮތުން ގޯސް ނިންމުމެއް ނޫނެވެ. (ޕެރ. 19–20)

ބަލާފައިވާ ޤާނޫނުތައް

• ދައުލަތުގެ މާލިއްޔަތު ޤަވާޢިދު (11 ފެބުރުއަރީ 2009) ގެ 8.29 އަދި 8.32 ވަނަ މާއްދާ