އެމް ސެވަން ޕްރިންޓް ޕްރައިވެޓް ލިމިޓެޑް ވ. މެގަ ގްލޯބަލް އެއަރސަރވިސް (މޯލްޑިވްސް) ޕްރައިވެޓް ލިމިޓެޑް

ނަތީޖާ: އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަށު ކޯޓު: ސިވިލް ކޯޓު 1120/Cv-C/2019

ކޯޓުން ނިންމަން ޖެހުނު ސުވާލު

ލިޔުމުން އެއްބަސްވުމެއް ނެތި، ޚިދުމަތުގެ އިންވޮއިސްގައި ބަޔާންކޮށްފައިވާ (ދުވާލަކަށް 0.5%) ޖޫރިމަނާ، އިންވޮއިސް ބަލައިގަތުމުން ޟިމްނީ ގޮތުން ޤަބޫލުކުރިކަމަށް ބަލައި ނަގައިދެވޭތޯ.

ކަނޑައެޅި ޤާނޫނީ އުޞޫލުތައް

1. ޖޫރިމަނާ ނުވަތަ ޝަރުޠު ޖަޒާއީއާ ގުޅޭ ގޮތުން މިހާރު ޢަމަލުކުރެވެނީ ސުޕްރީމް ކޯޓުގެ 2020/SC-A/28 ޤަޟިއްޔާގެ އަޣްލަބިއްޔަތު ރައުޔުގައި ކަނޑައަޅާފައިވާ ހަމަތަކަށް ކަމާއި، ޝަރުޠު ޖަޒާއީގެ ދަށުން ފައިސާ ނަގައިދެވޭނީ، އެ މާއްދާއަކީ އެއްބަސްވުމާ ޚިލާފުވުމުން ލިބޭ ގެއްލުން ފޫބެއްދުމަށް ބޭނުންވާ މިންވަރުގެ އެކަށީގެންވާ އަންދާޒާއެއް (ލިކުއިޑޭޓެޑް ޑެމޭޖަސް) ކަމަށްވާނަމަ، ޚިލާފުވާ ފަރާތަށް ޢުޤޫބާތެއް ކުރިމަތިކުރުމަށް ހިމަނާފައިވާ ޕެނަލްޓީ ކްލޯޒެއް ނޫންނަމައެވެ. (ޕެރ. 14–15)
2. ޖޫރިމަނާގެ ގޮތުގައި ހޯދަން އެދޭ ޢަދަދަކީ ފޯރުކޮށްދިން ޚިދުމަތަށް ދައްކަންޖެހޭ ޢަދަދަށްވުރެ ތިން ގުނައަށްވުރެވެސް ބޮޑު ޢަދަދެއްނަމަ، އެއީ ޕެނަލްޓީއެއް ނުވަތަ ޢުޤޫބާތެއްގެ ގޮތުގައި ބެލުމުގެ ފުރުޞަތު އޮވެއެވެ. (ޕެރ. 16)
3. ކޮންޓްރެކްޓެއްގައި ޝަރުޠު ޖަޒާއީއާ ގުޅޭ މާއްދާއެއް ނެތް ޙާލަތުގައި، އެއް ބައިވެރިއަކު އަނެކަކަށް ފޮނުވާ އެންގުމެއްގައި ނުވަތަ އިންވޮއިސްއެއްގައި ފައިސާ ނުދައްކައިފިނަމަ ޖޫރިމަނާ ކުރެވޭނެކަމަށް ބަޔާންކޮށްފައި އޮވެ، އެ އިންވޮއިސް ލިބި ހަނު ހުރުމަކުން އެއްބަސްވުމަށް ބަދަލެއް ނާދޭނެ ކަމާއި އައު އެއްބަސްވުމެއް ވުޖޫދުވީ ކަމަކަށް ނުވާނެއެވެ. (ޕެރ. 17)

ބަލާފައިވާ ޤާނޫނުތައް

• ޤާނޫނު ނަންބަރު 4/91 (ކޮންޓްރެކްޓާބެހޭ ޤާނޫނު) ގެ 5 ވަނަ މާއްދާ
• ސުޕްރީމް ކޯޓުގެ 2020/SC-A/28 (ޙަސަން ޢަލީމަނިކު ވ. އަޙްމަދު ޖަނާޙް)
• ސުޕްރީމް ކޯޓުގެ 2019/SC-A/13 އަދި 2021/SC-A/52 (ފާހަގަކުރެވުނު ނުކުތާ 37.3)
• ސުޕްރީމް ކޯޓުގެ 2013/SC-A/27 (އިސްތިއުނާފުކުރި ފަރާތުން ހުށަހެޅި)
• ސުޕްރީމް ކޯޓުގެ 2014/SC-A/01 (އިސްތިއުނާފުކުރި ފަރާތުން ހުށަހެޅި)