މިނިސްޓްރީ އޮފް ޓޫރިޒަމް ވ. ޙާމިދު އިސްމާއީލް

ނަތީޖާ: އިސްތިއުނާފު ބާޠިލް، ވަގުތީ އަމުރު ޤާއިމް

ދަށު ކޯޓު: ސިވިލް ކޯޓު B2-CR2/VA/2020/01

ކޯޓުން ނިންމަން ޖެހުނު ސުވާލު

ކ. ދިއްފުށި ފަޅުގެ ކުލީގެ އެއްބަސްވުން ދައުލަތުން ބާޠިލުކުރުމާ ގުޅޭ މައްސަލަ ނިމެންދެން، ފަޅުގައި މަސައްކަތްކުރުން ހުއްޓާލުމަށާއި ހުއްދަ ނުދިނުމަށް ސިވިލް ކޯޓުން ނެރުނު ވަގުތީ އަމުރު، ދައުލަތުގެ ހެކި، ތިންވަނަ ފަރާތުގެ ޙައްޤު، އަދި ޟަރޫރަތަށް ރިޢާޔަތްނުކޮށް ފަނޑިޔާރުންގެ ޤާނޫނުގެ 5 ވަނަ މާއްދާގެ (ހ) އާ ޚިލާފަށް ނެރުނީތޯ.

ކަނޑައެޅި ޤާނޫނީ އުޞޫލުތައް

1. ޝަރީޢަތް ނިމުމުގެ ކުރިން ވަގުތީ އަމުރެއް ނުނެރެފިނަމަ ޙުކުމްކުރެވޭއިރު އެ ޙުކުމުގެ ބޭނުން ނެތިދާނެކަމަށް ޤަބޫލުކުރެވޭ ސަބަބެއް އޮވެއްޖެނަމަ، ނުވަތަ ދެ ފަރާތުން ފަރާތަކަށް ގެއްލުމެއް ލިބިދާނެކަމަށް މައްސަލަ ބަލާ ފަނޑިޔާރަށް ފެނިއްޖެނަމަ، ވަގުތީ އަމުރެއް ނެރުމަކީ ޤާނޫނީ ގޮތުން ފަނޑިޔާރަށް ލިބިގެންވާ ބާރެކެވެ. (ޕެރ. 5.2)
2. ވަގުތީ އަމުރަށް އެދޭ ފަރާތަށް ޤާނޫނީ ޙިމާޔަތް ލިބެންޖެހޭ މައުޟޫޢީ ޙައްޤެއް ނުވަތަ ޤާނޫނީ މަރުކަޒެއް އޮތުމުގެ އިޙްތިމާލު ފާޅުކަން ބޮޑުގޮތެއްގައި ޤާއިމުވެ، އަޞްލު ދަޢުވާ ލަސްވެގެން ހިނގައްޖެނަމަ އިޢާދަނުކުރެވޭ ގެއްލުމެއް ލިބިދާނެކަމަށް ޝަރީޢަތަށް ބުރަވެވޭނަމަ، ވަގުތީ އަމުރު ނެރުމަކީ ޝަރުޢީ ޤާނޫނީ އުޞޫލުތަކާ ޚިލާފު ކަމެއް ނޫނެވެ. (ޕެރ. 5.1، 5.7)
3. އެއްބަސްވުން ބާޠިލުކުރީ އެއްބަސްވުމާ ޚިލާފަށްތޯ ކަނޑައެޅިގެންދާނީ މައްސަލައިގެ މައުޟޫޢުގައި ގޮތެއް ކަނޑައެޅޭއިރު ކަމަށްވާތީ، ވަގުތީ އަމުރުގެ މަރުޙަލާގައި ބަލަނީ ފުރަތަމަ ނަޒަރުން ފެންނަން އޮތް ޙަޤީޤަތްތަކަށެވެ. (ޕެރ. 5.5)
4. ތިންވަނަ ފަރާތެއްގެ ޙައްޤެއް އުފެދިފައިވާކަމަށް ހަމައެކަނި ބުނުމުން، އެ ތިންވަނަ ފަރާތުން އެތަނުގައި ކޮށްފައިވާ ނުވަތަ ކުރަމުންދާ ކަމެއް ބަޔާންނުކުރާނަމަ، އެއީ ވަގުތީ އަމުރު ނެރުމަށް ހުރަހެއް ނޫނެވެ؛ އަދި ވަގުތީ އަމުރަށް އެދޭ ފަރާތުގެ މުދާ އެތަނުގައި ހުރިކަމާއި އެ ފަރާތުން ޚަރަދުކޮށް ބިން ހިއްކާފައިވާކަމަށް ބުނާ ބުނުމަށް އަނެއް ފަރާތުން އިންކާރުނުކުރުމަކީ ވަގުތީ އަމުރަށް ރިޢާޔަތްކުރެވޭ ކަމެކެވެ. (ޕެރ. 5.6–5.7)

ބަލާފައިވާ ޤާނޫނުތައް

• ޤާނޫނު ނަންބަރު 13/2010 (ދިވެހިރާއްޖޭގެ ފަނޑިޔާރުންގެ ޤާނޫނު) ގެ 5 ވަނަ މާއްދާގެ (ހ) (އިސްތިއުނާފީ ނުކުތާތަކުގައި)