ޓްރެވަލް ސެންޓަރ މޯލްޑިވްސް ޕްރައިވެޓް ލިމިޓެޑް ވ. ޔޯގާ ޓްރެވަލްސް ލިމިޓެޑް

ނަތީޖާ: އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަށު ކޯޓު: ސިވިލް ކޯޓު 1994/Cv-C/2020

ކޯޓުން ނިންމަން ޖެހުނު ސުވާލު

ރިސޯޓެއްގެ ރޫމް ބުކްކުރުމަށް ޓްރެވަލް އެޖެންޓަށް ދެއްކި ފައިސާ ރިސޯޓަށް ނުދައްކާ ހުރިއިރު، އެއްބަސްވުމުގައިވާ "ނަން-ރީފަންޑަބަލް" ޝަރުޠަށް ބިނާކޮށް އެފައިސާ އެޖެންޓަށް ހިފެހެއްޓޭތޯ؛ އަދި ސިވިލް ކޯޓުން ދެފަރާތުގެ އެއްބަސްވުމަށް ރިޢާޔަތްނުކޮށް ފައިސާ އަނބުރާ ދިނުމަށް ޙުކުމްކުރި ކަމަށް ބުނާ އިސްތިއުނާފީ ނުކުތާތަކުގައި އެކަށީގެންވާ ޤާނޫނީ ބަހުސެއް ހުށަހެޅިފައިވޭތޯ.

ކަނޑައެޅި ޤާނޫނީ އުޞޫލުތައް

1. ރިސޯޓަށް ފައިސާ ދައްކާނީ ފުލް ޕޭމަންޓް ލިބުމުން ކަމަށް ދެފަރާތުގެ މެދުގައި އެއްބަސްވެފައި ނުވާއިރު، ރިސޯޓަށް ދެއްކުމަށް ކްލައިންޓުން ހޯދި ފައިސާ ރިސޯޓަށް ނުދެއްކުމަށް ފުލް ޕޭމަންޓް ނުލިބުން ސަބަބަކަށް ހެދޭނެ ކަމަށް ނުބެލެއެވެ.
2. ދެއްކި ފައިސާ ދައްކާފައިވަނީ ރިސޯޓުގެ ރޫމް ބުކްކުރުމަށްޓަކައި ރިސޯޓަށް ދެއްކުމަށް ކަމަށްވާއިރު، އެއްބަސްވެފައިވާގޮތަށް އެފައިސާ ރިސޯޓަށް ދައްކާފައި ނުވާނަމަ ފައިސާ ރީފަންޑް ނުކުރެވޭނެ ޝަރުޠު ނުހިނގާނެ ކަމަށް ސިވިލް ކޯޓުން ކަނޑައެޅި ކަނޑައެޅުމާ ޚިލާފުވާ ޤާނޫނީ ހަމައެއް އިސްތިއުނާފުކުރި ފަރާތަށް ބަޔާންކޮށްދެވިފައި ނުވާތީ އެ ކަނޑައެޅުން ޤާއިމްކުރެވުނެވެ.
3. ދަށު ކޯޓުން އެއްބަސްވުމަށް ރިޢާޔަތްނުކޮށް މައްސަލަ ނިންމި ކަމަށް ބުނާނަމަ، ރިޢާޔަތްނުކުރީ އެއްބަސްވުމުގައިވާ ކޮން ކަމަކަށްކަން އިސްތިއުނާފުކުރާ ފަރާތުން ބުނެދޭންޖެހެއެވެ؛ އަދި ދަށު ކޯޓުގެ ކަނޑައެޅުމެއް ޚިލާފުވަނީ އެއްބަސްވުމުގެ ކޮން ޝަރުޠަކާ ނުވަތަ ކޮން ޤާނޫނީ ހަމައަކާކަން ބަޔާންނުކުރާނަމަ، އިސްތިއުނާފީ ނުކުތާގައި އެކަށީގެންވާ ޤާނޫނީ ބަހުސެއް ހުށަހެޅިފައިވާ ކަމަށް ނުބެލެވެއެވެ.
4. ޚިދުމަތެއް ފޯރުކޮށްދީފައިވާކަން ނުވަތަ ޚިދުމަތަށް ޚަރަދެއް ކޮށްފައިވާކަން އެނގޭ ހެއްކެއް ނެތުމުން ޓްރާންސްފަރ ޗާޖު އެޖެންޓަށް ނަގައިނުދެވޭނެ ކަމަށް ދަށު ކޯޓުން ކުރި ކަނޑައެޅުމާއި، ހެކި ބަލައިނުގަތުމަށް ދަށު ކޯޓުން ނިންމި ނިންމުމާ ޚިލާފުވާ ޤާނޫނީ ހަމައެއް ބަޔާންނުކުރެވުމުން، އެ ނިންމުންތަކަށް ބަދަލެއް ނައެވެ.