ޢަބްދުލްމުޣުނީ ވ. ޕްރިމިއަރ ޕްރޮޕަޓީ ޕްރައިވެޓް ލިމިޓެޑް

ނަތީޖާ: އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަށު ކޯޓު: ސިވިލް ކޯޓު 135/Cv-C-HD/2021

ކޯޓުން ނިންމަން ޖެހުނު ސުވާލު

އެޕާޓްމަންޓް ގަތް ފަރާތާއި ބިލްޑިންގ މެނޭޖްކުރާ ކުންފުންޏާ ދެމެދު ސީދާ ވަކީލު ފީއާ ބެހޭ އެއްބަސްވުމެއް ނެތިއްޔާ، ވަކީލު ފީ ގަތް ފަރާތުގެ ކިބައިން ނަގައިދެވޭނެތޯ.

ކަނޑައެޅި ޤާނޫނީ އުޞޫލުތައް

1. ކުއްޔަށް ގެންދާ ތަކެތީގެ ކުލި ޝަރީޢަތުން ނަގައިދިނުމުގެ މައްސަލަތައް ފިޔަވައި، އެހެން މައްސަލަތަކުގައި ޤާނޫނީ ވަކީލުންގެ ފީ އަނެއް ޚަޞްމުގެ ކިބައިން ނަގައިދެވޭނީ ދެ ޚަޞްމުންގެ މެދުގައި އެކަމާ ގުޅޭ އެއްބަސްވުމެއް ވެފައިވާނަމައެވެ؛ އެފަދަ އެއްބަސްވުމެއް ނެތްނަމަ ވަކީލު ފީ ނަގައި ނުދެވޭނެއެވެ. (ޕެރ. 11-12)
2. "ކޮލަޓެރަލް އެގްރީމެންޓް" އަކީ މައި އެއްބަސްވުމުގެ ބައެއް ކަންކަން ފުރިހަމަކުރުމަށް، މައި އެއްބަސްވުމުގެ ފަރާތެއްގެ ޒިންމާތައް އަނެއް ފަރާތުގެ ހުއްދައާއެކު ތިންވަނަ ފަރާތަކާ ޙަވާލުކުރުމަށް ހެދޭ އެއްބަސްވުމެކެވެ. އޭގައި މައި އެއްބަސްވުމާ ފުށުއަރާ މާއްދާއެއް ނެތްނަމަ، މައި އެއްބަސްވުމާ އެއްގޮތަށް ޒިންމާ އަދާކުރަން ޖެހޭ ތިންވަނަ ފަރާތަށް މައި އެއްބަސްވުމުގެ ދަށުން ލިބޭ ބާރުތައް ލިބިގެންދެއެވެ. (ޕެރ. 16)
3. ގަތް ފަރާތާއި މެނޭޖްކުރާ ކުންފުންޏާ ދެމެދު ސީދާ އެއްބަސްވުމެއްގައި ސޮއިކޮށްފައި ނުވި ނަމަވެސް، ވިއްކި ފަރާތާއި މެނޭޖްކުރާ ކުންފުންޏާ ދެމެދު ވެފައިވާ ކޮލަޓެރަލް އެގްރީމެންޓަށް ޢަމަލުކުރުމަކީ ގަތް ފަރާތަށް ލާޒިމްވާ ކަމެކެވެ. (ޕެރ. 17)
4. ގަނެވިއްކުމުގެ އެއްބަސްވުމުގެ ބައެއްކަމުގައިވާ ބިލްޑިންގ ހިންގާ ޤަވާޢިދުގައި، ޤަވާޢިދާ ޚިލާފުވާ ފަރާތުގެ ކިބައިން ޤާނޫނީ ވަކީލުންގެ އަގު ހޯދުމުގެ އިޚްތިޔާރު ބޯޑަށް ދީފައިވާނަމަ، ބިލްޑިންގ މެނޭޖްކުރާ ކުންފުންޏަށް ގަތް ފަރާތުގެ ކިބައިން ވަކީލު ފީ ހޯދުމުގެ ބާރު ލިބިގެންވެއެވެ. (ޕެރ. 18)

ބަލާފައިވާ ޤާނޫނުތައް

• ޤާނޫނު ނަންބަރު 6/2008 (ޢާންމު ޤަވާއިދުތަކާބެހޭ ޤާނޫނު) ގެ ޖަދުވަލު 2 ގައިވާ ދިވެހިރާއްޖޭގައި ވަކާލާތުކުރާ ވަކީލުންނާބެހޭ ޤަވާއިދުގެ 5 ވަނަ މާއްދާ (2009/HC-A/348 ގައި ހަވާލާދީފައި)
• ކުއްޔަށް ގެންދާ ތަކެތީގެ ކުލި ޝަރީޢަތުން ނަގައިދިނުމާބެހޭ ޤަވާއިދު
• ހައިކޯޓުގެ ނަންބަރު 2009/HC-A/348
• ހައިކޯޓުގެ ނަންބަރު 2013/HC-A/218