ބަނީ ހޯލްޑިންގްސް (ބީވީއައި) ލިމިޓެޑް ވ. އެސް.ޖޭ ޓްރޭޑް ޕްރައިވެޓް ލިމިޓެޑް

ނަތީޖާ: ފައިސާ ނަގައިދިނުމަށް ކަނޑައެޅި ބައި ބާޠިލުކޮށް، ވާޤިޢާ ކަށަވަރުކޮށް އަލުން ބެލުމަށް ސިވިލް ކޯޓަށް ތަޙުވީލުކުރި

ދަށު ކޯޓު: ސިވިލް ކޯޓު 2115/Cv-C/2019

ކޯޓުން ނިންމަން ޖެހުނު ސުވާލު

އިންވޮއިސްތަކުގެ ފައިސާ ހޯދުމަށް ކުރި ދަޢުވާގައި، ދަޢުވާކުރި ފަރާތުން ދަށު ކޯޓުގައި މައްސަލަ ހިނގަމުންދަނިކޮށް ފޮނުވި، ދަޢުވާކުރި އަދަދަށްވުރެ މަދު ބާކީއެއް ބަޔާންކުރާ އީމެއިލަށް ރިޢާޔަތްނުކޮށް، މައްސަލައިގެ ވާޤިޢާ ކަށަވަރުނުކޮށް، ފައިސާ ނަގައިދިނުމަށް ސިވިލް ކޯޓުން ޙުކުމްކުރުން ރަނގަޅުތޯ.

ކަނޑައެޅި ޤާނޫނީ އުޞޫލުތައް

1. މައްސަލައެއްގައި ގޮތެއް ކަނޑައެޅުމުގެ ކުރިން އެ މައްސަލައެއްގެ ވާޤިޢާ ކަށަވަރުވާން ޖެހެއެވެ. ވާޤިޢާ ކަށަވަރުނުވާނަމަ މައުޟޫޢުގައި ޢަދުލުވެރި ނިންމުމެއް ނުނިންމޭނެއެވެ. މައްސަލައިގެ ވާޤިޢާ ކަށަވަރުކުރުމަކީ މައްސަލަ ބަލާ ދަށު ކޯޓުން ކުރަންޖެހޭ ކަމެކެވެ.
2. ދަޢުވާކުރާ ފަރާތުން ހޯދުމަށް އެދޭ ފައިސާއާމެދު އެފަރާތުން ތަފާތު ދެ ބުނުމެއް (ދަޢުވާއާއި، ދަޢުވާއަށްފަހު ފޮނުވި އީމެއިލް) ލިޔެކިޔުންތަކުން ފެންނަން އޮވެ، އެ އީމެއިލަށް ދަޢުވާކުރި ފަރާތުން އިންކާރުނުކުރާއިރު، އެ ލިޔުމަށް ރިޢާޔަތްކުރިގޮތާއި ވާޤިޢާ ކަށަވަރުކުރިގޮތް ދަށު ކޯޓުގެ ރިޕޯޓުން ފެންނަން ނެތްނަމަ، ދަށު ކޯޓުގެ ނިންމުން ދެމެހެއްޓޭކަށް ނެތެވެ.
3. ދިވެހިރާއްޖޭގެ ކޯޓުތަކުގެ ޤާނޫނުގެ 32 ވަނަ މާއްދާގެ (ނ) ގެ ދަށުން، އިސްތިއުނާފުގައި ބަލާ މައްސަލައެއް ދަށު ކޯޓުގައި ބެލިއިރު ނުބެލި ހުރި ކަންތައްތަކެއް ހުރިކަން ފާހަގަކުރެވި، އަލުން ބެލުމުގެ މަޞްލަޙަތު ބޮޑުކަމަށް ފެނިއްޖެނަމަ، ބަލަންޖެހޭ ޤާނޫނީ އުޞޫލުތައް ކަނޑައަޅައި ހައިކޯޓުން މައްސަލަ ދަށު ކޯޓަށް ފޮނުވިދާނެއެވެ.
4. ދަށު ކޯޓުން ވާޤިޢާ ކަށަވަރުކޮށްފައިވާގޮތް ނޭނގޭ ޙާލަތުގައި، ހައިކޯޓުން މައްސަލައިގެ މައުޟޫޢާމެދު ގޮތެއް ކަނޑައެޅިދާނެ ޙާލަތެއް ނެތުމުން، ވާޤިޢާ ކަށަވަރުކޮށް ދައްކަންޖެހޭ ފައިސާގެ ޞައްޙަ ޢަދަދު ކަނޑައެޅުމަށް، ކޯޓުތަކުގެ ޤާނޫނުގެ 46 ވަނަ މާއްދާގެ (ށ) ގެ ދަށުން މައްސަލަ ދަށު ކޯޓަށް ތަޙުވީލުކުރެވޭނެއެވެ.

ބަލާފައިވާ ޤާނޫނުތައް

• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 32 ވަނަ މާއްދާގެ (ނ)
• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 46 ވަނަ މާއްދާގެ (ށ)