ޕްރޮސިކިއުޓަރ ޖެނެރަލް ވ. ޢަލީ ނަދީމް

ނަތީޖާ: ދަށުކޯޓުގެ ނިންމުން ބާޠިލު (ދަޢުވާ މުއްދަތުން ބޭރުން އުފުލިކަމަށް ނިންމި ނިންމުން)

ދަށު ކޯޓު: ސ. ހިތަދޫ މެޖިސްޓްރޭޓް ކޯޓު S2C/SHN/(22-2024)/(2024)/3

ކޯޓުން ނިންމަން ޖެހުނު ސުވާލު

މަޤުބޫލު ސަބަބެއްނެތި ޢާއްމު ތަނެއްގައި ތޫނު އެއްޗެއް ގެންގުޅުމުގެ ދަޢުވާއެއްގައި، ޖިނާއީ އިޖުރާއަތުގެ ޤާނޫނުގެ 94 ވަނަ މާއްދާގެ (ނ) ގައިވާ 15 ދުވަހުގެ މުއްދަތު ގުނަން ފަށާނީ ފުލުހުން ފޯމުގައި ޖަހާފައިވާ ތާރީޚުންތޯ ނުވަތަ ތަޙްޤީޤު ނިންމައި ޕްރޮސިކިއުޓަރ ޖެނެރަލްގެ އޮފީހަށް މައްސަލަ ހުށަހެޅުނު ތާރީޚުންތޯ، އަދި ދަޢުވާ މުއްދަތު ފާއިތުވުމުން ބާޠިލުކުރި ނިންމުން ރަނގަޅުތޯ.

ކަނޑައެޅި ޤާނޫނީ އުޞޫލުތައް

1. ޖިނާއީ އިޖުރާއަތުގެ ޤާނޫނުގެ 94 ވަނަ މާއްދާގެ (ނ) ގެ ދަށުން ދަޢުވާ އުފުލުމަށް ލިބޭ 15 ދުވަހުގެ މުއްދަތު ހިނގަން ފަށާނީ، މައްސަލައެއްގެ ތަޙްޤީޤު ނިންމައި ޕްރޮސިކިއުޓަރ ޖެނެރަލްގެ އޮފީހަށް ހުށަހެޅޭ ހިސާބުންނެވެ. (ޕެރ. 23)
2. މުއްދަތު ގުނަން ފެށޭ ތާރީޚު ކަނޑައެޅެނީ ތަޙްޤީޤު ނިންމައި ޕްރޮސިކިއުޓަރ ޖެނެރަލްގެ އޮފީހަށް މައްސަލަ ހުށަހެޅުނު ތާރީޚު ކަށަވަރުކުރުމުންނެވެ؛ އެ ތާރީޚު ކަނޑައެޅުމަކީ މައްސަލައިގެ ނަތީޖާ ބަދަލުވާފަދަ މުހިންމު ނުކުތާއެކެވެ. (ޕެރ. 22)
3. ޖިނާއީ ތަޙްޤީޤުތަކުގައި ޕްރޮސިކިއުޝަންގެ ދައުރަކީ ތަޙްޤީޤުކުރާ އިދާރާތަކުން ހުށަހަޅާ ހެއްކާއި ޤަރީނާ ވަޒަންކޮށް ދަޢުވާ އުފުލަންޖެހޭތޯ ކަނޑައެޅުމެވެ؛ ތަޙްޤީޤު ފުރިހަމަވަންދެން ޕްރޮސިކިއުޓަރ ޖެނެރަލްގެ އޮފީހާއި ފުލުހުންނާ ދެމެދު މަޝްވަރާކޮށް މުޢާމަލާތްކުރުމަކީ އާދައާ ޚިލާފު ކަމެއް ނޫނެވެ. (ޕެރ. 20، ޤާނޫނުއަސާސީގެ 223 ވަނަ މާއްދާ)
4. ފުލުހުން ތައްޔާރުކުރި ފޯމެއްގައި ޖަހާފައިވާ ތާރީޚަކަށް އެކަނި ބަރޯސާވެ، އޭގެ ފަހުން ފުލުހުންނާއި ޕްރޮސިކިއުޝަނާ ދެމެދު ކުރެވުނު މުޢާމަލާތްތަކާއި ތަޙްޤީޤު ނިންމައި އަލުން ހުށަހެޅި ރެކޯޑުތަކަށް ބަލައިނުލާ، ދަޢުވާ މުއްދަތުން ބޭރުން އުފުލިކަމަށް ނިންމުމަކީ ޕްރޮސިކިއުޓަރ ޖެނެރަލްގެ މަސްއޫލިއްޔަތުގެ ޠަބީޢަތަށް ސަމާލުކަން ނުދީ ހަނި ވިސްނުމަކުން ނިންމާ ރަނގަޅުނޫން އިޖުރާއީ ނިންމުމެކެވެ. (ޕެރ. 13، 15)
5. ޑިއުޓީ ޕްރޮސިކިއުޝަންގެ ލޮގުން ތަޙްޤީޤު ކުރިއަށް ދިޔަކަން (މިސާލަކަށް ނަޞޭޙަތުގެ އެއްބަސްވުމަށް ފުރުޞަތު ދިނުން) ފެންނަން އޮތްއިރު، ފޯމުގެ ތާރީޚުގެ ފަހުން ތަޙްޤީޤުގައި އެއްވެސް ފިޔަވަޅެއް ނާޅާކަމަށް ބުނާ ދިފާޢަކީ އަސާސެއްނެތް ބުނުމެކެވެ. (ޕެރ. 12، 11)

ބަލާފައިވާ ޤާނޫނުތައް

• ޤާނޫނު ނަންބަރު 2016/12 (ޖިނާއީ އިޖުރާއަތުގެ ޤާނޫނު) (ޖިނާއީ އިޖުރާއަތުގެ ޤާނޫނަށް 1 ވަނަ އިޞްލާޙު ގެނައުމުގެ ޤާނޫނުން އިޞްލާޙުކުރި) ގެ 94 ވަނަ މާއްދާގެ (ނ)
• ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 223 ވަނަ މާއްދާ
• ބިރު ދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު (ޤާނޫނު ނަންބަރު 2010/17) ގެ 2 ވަނަ މާއްދާ (ދަޢުވާގެ އަސާސް)