ޕްރޮސިކިއުޓަރ ޖެނެރަލް ވ. ނަން ފޮރުވާފައި

މި ޤަޟިއްޔާގައި ފަރާތްތަކުގެ ނަން ފޮރުވާފައި.

ނަތީޖާ: ދަޢުވާ ފޯމް ބާޠިލު (އިސްތިއުނާފުކުރެވުނު ނިންމުން ދަށުކޯޓުން މުރާޖަޢާކޮށް އިޞްލާޙުކޮށްފައިވާތީ)

ދަށު ކޯޓު: ކްރިމިނަލް ކޯޓު 145-B2/SHN/(770-2018)/2025/04

ކޯޓުން ނިންމަން ޖެހުނު ސުވާލު

ބްލެކްމެއިލްކުރުމާއި އޮރިޔާންކާޑު ހެދުމާއި ގެންގުޅުމުގެ ދަޢުވާއެއްގައި، ޖިނާއީ އިޖުރާއަތުގެ ޤާނޫނުގެ 149-1 ވަނަ މާއްދާގެ (ރ) ގައިވާ ޤަވާޢިދު ނެތީސް ސިއްރު ހެކިވެރިޔަކު ކާކުކަން ނޭނގޭގޮތަށް އަޑު ބަދަލުކޮށް ހެކިބަސް ނެގުމަށް ދައުލަތުން އެދުނު އެދުން ދަށުކޯޓުން ޤަބޫލުނުކުރުމާމެދު ކުރި އިސްތިއުނާފު، އެ ނިންމުން ދަށުކޯޓުން މުރާޖަޢާކޮށް އިޞްލާޙުކުރުމަށްފަހު ހައިކޯޓުން ބަލަންޖެހޭތޯ.

ކަނޑައެޅި ޤާނޫނީ އުޞޫލުތައް

1. ޖިނާއީ އިޖުރާއަތުގެ ޤާނޫނުގެ 149-1 ވަނަ މާއްދާގެ (ރ) ގައިވާ ޤަވާޢިދު ނެތުމުގެ ކަންބޮޑުވުން ފާހަގަކުރި ނަމަވެސް، ދަޢުވާލިބޭ ފަރާތް ޙާޟިރުނުވާ ގޮތަށް ހެކިވެރިޔާގެ ހެކިބަސް ނެގުމަށް ދަށުކޯޓުން ނިންމާފައިވުމަކީ ވަކި މިންވަރަކަށް ހެކި ރައްކާތެރިކުރުމުގެ ފިޔަވަޅު އަޅާފައިވުމެވެ. (ޕެރ. 15)
2. އިސްތިއުނާފުކުރެވުނު ނިންމުމަކީ ދަށުކޯޓުން ފަހުން މުރާޖަޢާކޮށް އިޞްލާޙުކޮށްފައިވާ، ހިނގަމުންދާ ޝަރީޢަތެއްގެ އިޖުރާއަތާ ގުޅޭ ނިންމުމެއްނަމަ، އެ ނިންމުން ދަމަހައްޓައި ނުވަތަ ބާޠިލުކޮށް ހައިކޯޓުން ގޮތެއް ކަނޑައެޅުމަކީ ދަށުކޯޓުގައި ހިނގަމުންދާ ޝަރީޢަތަށް ނޭދެވޭ އަސަރު ކުރާނެ ކަމެއް (މިސާލަކަށް ހެކިބަސް ނެގުނު ގޮތާމެދު ސުވާލު އުފެދުން) ކަމުގައި ބެލެވޭތީ، އިސްތިއުނާފުގެ ދަޢުވާ ފޯމު ބާޠިލުކުރެވެއެވެ. (ޕެރ. 17-18)

ބަލާފައިވާ ޤާނޫނުތައް

• ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 149-1 ވަނަ މާއްދާގެ (ރ)