ޝަމްސް ޕވޓ ލޓޑ ވ. ނެކްސްޓް ގްރޫޕް ޕވޓ ލޓޑ

މުޢާމަލާތެއްގެ އަޞްލަށް އިންކާރުކޮށް އެއީ އެނގިފައިނުވާ މުޢާމަލާތެއްކަމަށް ބުނާ ފަރާތަކަށް، އެ މުޢާމަލާތުގެ ތަފްޞީލާމެދު (ފައިސާގެ ބާވަތް ފަދަ) ވާހަކަ ދެއްކުމަކީ އޭނާގެ އިންކާރާ ތަޢާރުޟުވާ ކަމެކެވެ. (ޕެރ. 11-13)

ކުލި ދައްކަން އެއްބަސްވީ ރާއްޖޭގެ ރުފިޔާ ފިޔަވައި އެހެން ފައިސާއަކުން ކަމަށްވެފައި އެއީ ޤާނޫނާއި ގަވާއިދާ އެއްގޮތްވާ ކަމަކަށް ނުވިޔަސް، އެކަމުގެ ސަބަބުން މުޅި މުޢާމަލާތު އަޞްލުން ބާޠިލެއް ނުވެ، އެއީ ބާޠިލުކުރެވިދާނެ މުޢާމަލާތަކަށް ވެއެވެ؛ މުދާ ބޭނުންކުރުމަށްފަހު ކުލި ދައްކާ ހިސާބުން ބޭރު ފައިސާގެ ދިފާޢު ނަގައިގެން މުޅި މުޢާމަލާތު ބާޠިލުކުރުމަކީ އަނެއް ފަރާތަށް ބޮޑު ބޭއިންސާފެކެވެ. (ޕެރ. 13)

ވިއްކުމާއި ދިނުމާއި ޢާރިޔާއާ ތަފާތުކޮށް، ކުލީގެ މުޢާމަލާތުގައި މިލްކުވެރިޔާ ނޫން ފަރާތަކަށްވެސް ޝަރުޢީ އަދި ޤާނޫނީ ހަމަތަކާ އެއްގޮތަށް މުދަލެއް ތިންވަނަ ފަރާތަކަށް ކުއްޔަށް ދޫކުރެވިދާނެއެވެ؛ ކުލި ދައްކާ ހިސާބުން ކުއްޔަށް ދިނީ މިލްކުވެރިޔާ ނޫންކަމަށް ބުނާ ސުވާލު ކުރިމަތިވާންޖެހޭނީ މިލްކުވެރި ފަރާތުންނެވެ. (ޕެރ. 14-15)

ހެއްކާބެހޭ ޤާނޫނުގެ 6 ވަނަ މާއްދާއަކީ ކިތާބީ ހެކީގެ ޞައްޙަކަން ކަނޑައަޅާ އިޖުރާއަތު ބަޔާންކުރާ މާއްދާއެއް ނޫނެވެ؛ ލިޔުމެއް ނުވަތަ ސޮއި ފާހަގަކުރުމުގެ އިޖުރާއަތަށް ދަށުކޯޓުގައި އެދިފައި ނުވާނަމަ، ހެކި ބެލުމަށް ނުބަލައިގެން ކޮށްފައިވާ ޙުކުމެއްކަމަށް ނުބެލެވޭނެއެވެ. (ޕެރ. 17)

ލިޔުމެއް ފޯޖުކޮށްފައިވާކަމަށް ހަމައެކަނި ބުނުމަކުން ލިޔުމުގެ ޞައްޙަކަން ނަފީނުވެއެވެ؛ އެ ތުހުމަތު ފަނޑިޔާރަށް ޤަބޫލުކުރެވޭ މިންވަރަށް ސާބިތުކުރުމަކީ ސުވާލު އުފައްދާ ފަރާތުގެ ޒިންމާއެވެ؛ އިދިކޮޅު ސާބިތުނުކުރެވޭހާ ހިނދަކު ލިޔުމުގެ ޞައްޙަކަން ދެމިއޮންނާނެއެވެ. 'ވެދާނެ' ކަމަށް ސުވާލު އުފެއްދުމަކުން އެ ޒިންމާއިން ބަރީއަ ނުވެވޭނެއެވެ. (ޕެރ. 18، 22)

ޔުނިފޯމް ޕްރޮސެސްއަކުން އުފައްދާ ލިޔުންތަކުގެ ތެރެއިން ކޮންމެ ލިޔުމަކީ އަނެއް ލިޔުމުގެ އަސްލެއްކަމުގައި ބެލެވޭނެ ނަމަވެސް، އެއް އަސްލަކުން ހަދާ ކޮޕީތަކަކީ އަސްލެއްގެ ގޮތުގައި ނުބެލެވޭނެއެވެ؛ ނަމަވެސް ސާނަވީ ހެއްކާމެދު ދަށުކޯޓުގައި ސުވާލު ނުއުފައްދާނަމަ، އެކަން ހައިކޯޓުގައި ބަޙުޘުގެ ނުކުތާއަކަށް ނުވެއެވެ. (ޕެރ. 21)

އިންވޮއިސްތަކާ ކުންފުނީގެ މެނޭޖިންގ ޑިރެކްޓަރ ޙަވާލުވެ ސޮއިކޮށް ސިއްކަ ޖަހައި، ކޯޓަށް މައްސަލަ ހުށަހަޅަންދެން އެއާމެދު އިޢުތިރާޟެއް ނުކުރާނަމަ، އެއީ އެ ކުންފުނިން ޤަބޫލުކޮށްފައިވާ ލިޔުންތަކެއްކަމަށް ބުރަވެ، ދަޢުވާ ސާބިތުކުރުމަށް ކިތާބީ ހެކީގެ ގޮތުގައި ބަލައިގަނެވޭނެއެވެ. (ޕެރ. 22-24)

ލައިސަންސެއް ނެތުމަކީ ފަރާތެއް މުޢާމަލާތެއްގެ ތެރެއަށް ނުވަންނަކަމުގެ ދަލީލެއް ނޫނެވެ؛ ލައިސަންސް ނެތި މުޢާމަލާތު ކޮށްފިނަމަ އެއީ އެ ފަރާތުން ކުރި ޤާނޫނާ ޚިލާފު ކަމެކެވެ. (ޕެރ. 27)