ނާސާ ލިންކް ޕްރައިވެޓް ލިމިޓެޑް ވ. ސްޓޭޓް އިލެކްޓްރިކް ކޮމްޕެނީ ލިމިޓެޑް

ނަތީޖާ: އިސްތިއުނާފު ބާޠިލް، ވަގުތީ އަމުރު ނެރެ ނުދިނުމަށް ދަށުކޯޓުން ނިންމި ނިންމުން ޤާއިމް

ދަށު ކޯޓު: ސިވިލް ކޯޓު 144-B10/VN/2022/10

ކޯޓުން ނިންމަން ޖެހުނު ސުވާލު

ކޮންޓްރެކްޓް ބާޠިލުކުރުމާ ގުޅިގެން ހުށަހެޅި ދަޢުވާއެއްގައި، ބާޠިލުކުރުމުގެ ނޯޓިސްއަށް ޢަމަލުކުރުން ފަސްކުރުމަށާއި މަސައްކަތް އެހެން ފަރާތަކާ ޙަވާލުނުކުރުމަށް ވަގުތީ އަމުރު ނެރެ ނުދިނުމަށް ސިވިލް ކޯޓުން ނިންމި ނިންމުން ރަނގަޅުތޯ (ތަދާރުކު ނުކުރެވޭ ގެއްލުމާއި ބެލެންސް އޮފް ކޮންވީނިއަންސް).

ކަނޑައެޅި ޤާނޫނީ އުޞޫލުތައް

1. ވަގުތީ އަމުރަކީ ކޯޓުގެ އިޚްތިޔާރީ ބާރުގެ ދަށުގައި އޮތް ކަމެކެވެ. (ޕެރ. 18)
2. ވަގުތީ އަމުރަކަށް އެދޭއިރު، މަދަނީ އިޖުރާއަތުގެ ޤާނޫނުގެ 242 ވަނަ މާއްދާގެ (ށ) ގެ ކޮން ނަންބަރެއްގައިވާ ކޮން ބާވަތެއްގެ އަމުރެއްކަން ސާފުވާންޖެހެއެވެ؛ 236 ވަނަ މާއްދާގެ (ށ) ގެ (2) ގެ ދަށުން އަމުރަށް އެދޭ ފޯމުގައި ނެރެދިނުމަށް އެދޭ އަމުރުގެ ބާވަތް ހިމަނަންވާނެއެވެ؛ ޤާނޫނުގެ މާއްދާއަކާ ޙަވާލާނުދީ ހުށަހަޅާ ހުށަހެޅުންތައް ބަލައިގަނެވިދާނެކަމަށް ޤަބޫލެއް ނުކުރެވެއެވެ؛ ކޯޓުތަކުން ކުރިއެކޭ އެއްގޮތަށް ޢަމަލުކުރާނަމަ މަދަނީ އިޖުރާއަތުގެ ބޭނުމެއް ނެތެވެ. (ޕެރ. 19، 20، 25)
3. އެދޭ އަމުރަކީ އެފިޑެވިޓް އާއެކު ހުށަހަޅަންޖެހޭ އަމުރެއްތޯ (244(ނ)، 337(ހ)(2)) ދެނެގަނެވޭނީ ޤާނޫނުގެ ކަމާގުޅޭ މާއްދާއާ ޙަވާލާދީގެންނެވެ. (ޕެރ. 22)
4. ވަގުތީ އަމުރަކަށް އެދިއްޖެނަމަ ފުރަތަމަ ބަލަންވީ ޙިމާޔަތް ލިބެންޖެހޭ މައުޟޫޢީ ޙައްޤެއް ނުވަތަ ޤާނޫނީ މަރުކަޒެއް އޮތުމުގެ އިޙްތިމާލު ފާޅުކަން ބޮޑުގޮތެއްގައި ޤާއިމުވޭތޯއެވެ؛ ކޮންޓްރެކްޓާ ޚިލާފުވެއްޖެކަމަށް ބުނާ ޖަދަލުކުރެވިދާނެ މައްސަލައެއް އޮތުމުން މި ޝަރުޠު ފުރިހަމަވެއެވެ. (ޕެރ. 27)
5. ދެވަނަ ސުވާލަކީ ވަގުތީ އަމުރު ނުނެރެއްޖެނަމަ ލިބިދާނެ ގެއްލުމަށް އެކަށީގެންވާ ބަދަލެއް (adequate remedy) ދެވިދާނެތޯއެވެ؛ ދެވޭނަމަ ޢާންމު އުޞޫލަކީ ވަގުތީ އަމުރު ނުނެރުމެވެ؛ ކޮންޓްރެކްޓާ ޚިލާފުވުމުގެ މައްސަލަތަކުގައި އަސާސީ ފަރުވާއަކީ ގެއްލުމުގެ ބަދަލެވެ؛ އިކުއިޓީގެ ދަށުން ދެވޭ އިންޖަންކްޓިވް ރިލީފަކީ އިސްތިސްނާއީ، ކޯޓުގެ އިޚްތިޔާރީ ފަރުވާއެކެވެ. (ޕެރ. 28)
6. ބެލެންސް އޮފް ކޮންވީނިއަންސް ބަލާއިރު، ވަގުތީ އަމުރު ނެރުމުން ނުވަތަ ނުނެރުމުން ބޮޑަށް ގެއްލުމާއި އުނދަގޫ ތަޙައްމަލުކުރަންޖެހޭނީ ކޮން ފަރާތެއްތޯ ވަޒަންކުރަންޖެހެއެވެ؛ އާންމު ބޭނުންތަކާ ގުޅިފައިވާ މަސައްކަތެއް ހުއްޓުވުމުގެ ގެއްލުން ޢާންމު ރައްޔިތުންނަށް ކުރާނަމަ އެކަމަށް ރިޢާޔަތްކުރެވޭނެއެވެ. (ޕެރ. 30)
7. މައުޟޫޢީ މައްސަލަ ނިމުމުން ދަޢުވާކުރާ ފަރާތަށް ލިބޭ ގެއްލުމަކީ މާލީގޮތުން އެކަށީގެންވާ ބަދަލު ދެވިދާނެ ގެއްލުމެއްނަމަ، ސްޓޭޓަސް ކުއޯ ހިފެހެއްޓުމަށް ވަގުތީ އަމުރު ނެރެންޖެހޭ ސަބަބެއް ނެތެވެ. (ޕެރ. 31)

ބަލާފައިވާ ޤާނޫނުތައް

• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 242 ވަނަ މާއްދާގެ (ހ) އަދި (ށ) (ޚާއްޞަކޮށް (ށ) ގެ (2)، (3)، (6))
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 236 ވަނަ މާއްދާގެ (ށ) ގެ (2)
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 244 ވަނަ މާއްދާގެ (ނ)
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 337 ވަނަ މާއްދާގެ (ހ) ގެ (2)
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 268 ވަނަ މާއްދާ، 284 ވަނަ މާއްދާގެ (ހ)، (ށ)، (ނ)، (ރ)
• ގަވާއިދު ނަންބަރު 2022/R-105 (ސިވިލް ކޯޓުގެ މަދަނީ އިޖުރާއަތުގެ ގަވާއިދު) ގެ 111 ވަނަ މާއްދާގެ (ހ) އަދި (ށ)
• ސުޕްރީމް ކޯޓުގެ ނެކްސްބިޒް ލިމިޓެޑް (އޮސްޓްރޭލިއާ) ވ. އެންޓި ކޮރަޕްޝަން ކޮމިޝަން ޤަޟިއްޔާ (2012/SC-A/21)