ޢަބްދުލްލަޠީފް ޢަބްދުލްޤާދިރު ވ. އާމިނަތު ޝީރީނާ އަދި އއ. ތޮއްޑޫ ކައުންސިލްގެ އިދާރާ

ނަތީޖާ: އިސްތިއުނާފު ބާޠިލް، ދަށުކޯޓުގެ ވަގުތީ އަމުރު ޤާއިމް

ދަށު ކޯޓު: އއ. ތޮއްޑޫ މެޖިސްޓްރޭޓް ކޯޓު U1MC/VA/2023/03

ކޯޓުން ނިންމަން ޖެހުނު ސުވާލު

ބަންޑާރަ ގޯތި ދޫކުރުމުގައި ކައިވެނީގެ ބަޔަށް ޕޮއިންޓް ދިނުމާމެދު ޖަދަލުކޮށް ހުށަހެޅި ދަޢުވާއެއްގައި، އެ ޕޮއިންޓް ލިބުނު ފަރާތާ ގޯތި ހަވާލުނުކުރުމަށް މެޖިސްޓްރޭޓް ކޯޓުން ނެރުނު ވަގުތީ އަމުރުގައި ސުޕްރީމް ކޯޓުގެ ނެކްސްބިޒް ޤަޟިއްޔާގައިވާ ވަގުތީ އަމުރުގެ ޝަރުޠުތައް ފުރިހަމަވޭތޯ.

ކަނޑައެޅި ޤާނޫނީ އުޞޫލުތައް

1. ވަގުތީ އަމުރެއް ނެރުމުގައި ބަލަންޖެހޭ ޢާންމު ޝަރުޠުތަކަކީ: (1) ވަގުތީ އަމުރަށް އެދޭ ފަރާތަށް ޤާނޫނީ ގޮތުން ޙިމާޔަތް ލިބެންޖެހޭ މައުޟޫޢީ ޙައްޤެއް ނުވަތަ ޤާނޫނީ މަރުކަޒެއް އޮތުމުގެ އިޙްތިމާލު ފާޅުކަން ބޮޑުގޮތެއްގައި ޤާއިމުވެގެން އޮތުން، (2) ވަގުތީ އަމުރު ނެރުމަކާ ނުލައި އަޞްލު ދަޢުވާ ލަސްވެގެން ހިނގައްޖެނަމަ ކުރިމަތިވެދާނެ ނުރައްކަލެއް އޮތުން، (3) އެދޭ ފަރާތަކީ އެފަދަ އަމުރަކަށް އެދުމުގެ ޞިފަތު ނުވަތަ ޙައިޘިއްޔަތު ޤާނޫނީ ގޮތުން ލިބިގެންވާ ފަރާތަކަށް ވުމެވެ. (ޕެރ. 17)
2. ގޯތި ދޫކުރުމުގެ އިޢުލާނަކާ ގުޅިގެން ގޯއްޗަށް އެދި ކުރިމަތިލި މީހަކަށް، ކައުންސިލުން ހަދާފައިވާ އުޞޫލުން ބޭރުން ޕޮއިންޓް ދީގެން އެއްވެސް މީހަކަށް ގޯތި ދޫނުކުރާކަން ކަށަވަރުކުރުމުގެ ޙައްޤު ފާޅުކަން ބޮޑުގޮތެއްގައި ލިބިގެންވެއެވެ؛ ސަބަބަކީ އުޞޫލާ ޚިލާފަށް ޕޮއިންޓް ދިނުމުން އުޞޫލާ އެއްގޮތަށް ޕޮއިންޓް ލިބޭ މީހުންނަށް ގޯތި ލިބުމުގެ ފުރުޞަތު ހަނިވާތީއެވެ. (ޕެރ. 18)
3. ކައިވެނީގެ ޙާލަތާ ގުޅުވައިގެން ގޯތި ދިނުމަށް ދެވޭ ޕޮއިންޓާމެދު ޖަދަލުކޮށް ހުށަހަޅާ ދަޢުވާއަކީ ވަރި ކާވެނީގެ ނުވަތަ ޢާއިލީ މައްސަލައެއް ނޫން، ޕޮއިންޓްދޭ އުޞޫލާ ގުޅިގެން ޕޮއިންޓް ދިން ގޮތާމެދު ހުށަހަޅާ މައްސަލައެކެވެ؛ އެހެންކަމުން ދަޢުވާކުރާ ފަރާތަކީ ކައިވެނީގެ ފަރާތެއް ނުވުމަކީ ދަޢުވާގެ ޙައިޘިއްޔަތު ނެތުމުގެ ސަބަބެއް ނޫނެވެ. (ޕެރ. 19-20، 22)
4. ޝަރުޠު ހަމަނުވާ ފަރާތަކާ ގޯތި ހަވާލުކޮށްފިނަމަ، އުޞޫލާ އެއްގޮތަށް ޕޮއިންޓް ލިބިގެން ގޯތި ލިބުމުގެ ފުރުޞަތު އޮތް މީހަކަށް އިޢާދަ ނުކުރެވޭފަދަ ގެއްލުމެއް ކުރިމަތިވާނެތީ، ވަގުތީ އަމުރުގެ ދެވަނަ ޝަރުޠު ހަމަވެއެވެ. (ޕެރ. 21)
5. މި ޝަރުޠުތައް ފުރިހަމަވާއިރު، މައުޟޫޢީ ޙުކުމް ކުރެވެންދެން ގޯތި ހަވާލުނުކުރުމަށް ނެރުނު ވަގުތީ އަމުރަށް ބަދަލު ގެންނަންޖެހޭ ސަބަބެއް ނެތެވެ. (ޕެރ. 22-23)

ބަލާފައިވާ ޤާނޫނުތައް

• ސުޕްރީމް ކޯޓުގެ ނަންބަރު 2012/SC-A/21 ޤަޟިއްޔާ (ނެކްސްބިޒް ލިމިޓެޑް ވ. އެންޓި ކޮރަޕްޝަން ކޮމިޝަން)
• ތޮއްޑޫ ކައުންސިލުގެ ބަންޑާރަ ގޯތި ދޫކުރުމުގެ އުޞޫލުގެ 2.2 (ހ) އަދި 2.2 (ރ)