މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ޕލކ ވ. ސީޕީއެސް މޯލްޑިވްސް ޕވޓ ލޓޑ

ކޮންޓްރެކްޓެއްގެ ރުކުންތައް ފުރިހަމަވެގެން އެކުލަވާލެވޭ ކޮންމެ ކޮންޓްރެކްޓެއް ދިވެހިރާއްޖޭގެ ޤާނޫނުތަކާއި އެޤާނޫނުތަކުން ބާރު ލިބިގެން ހެދޭ ޤަވާޢިދުތަކާއި އިސްލާމްދީނުގެ އަސްލަކާއި އިސްލާމީ ޝަރީޢަތާއި ޚިލާފުނުވާ ގޮތަށް އޮތްނަމަ، އެކޮންޓްރެކްޓެއްގައި ބަޔާންކުރާ ކަންކަމާއި އެއްގޮތްވާގޮތުގެ މަތީން ޢަމަލުކުރުމަކީ ކޮންޓްރެކްޓްގެ ބައިވެރިންގެ މައްޗަށް ލާޒިމްވާ ކަމެކެވެ. (ޕެރ. 3 (ހ))

ކޮންޓްރެކްޓެއްގެ ދަށުން އުފެދޭ އިލްތިޒާމެއް އަދާނުކުރުމުގެ ސަބަބުން ނުވަތަ އަދާކުރުން ލަސްވުމުގެ ސަބަބުން ލިބޭ ގެއްލުމުގެ ބަދަލުގެ މިންވަރު ވަޒަންކޮށް އެބަދަލު ނެގުމާއިމެދު ކުރިއާލައި އެއްބަސްވުމަކީ ކޮންޓްރެކްޓާބެހޭ ޤާނޫނާއި އިސްލާމީ ޝަރީޢަތާއި ފުށުއަރާކަމެއްކަމުގައި ބެލެވެން ނެތެވެ. (ޕެރ. 3 (ހ))

ދެފަރާތުގެ ދެމެދުގައި ވެވޭ އެއްބަސްވުމެއްގައި ބަދަލުގެ ގޮތުގައި ނަގައިދެވޭނެ މިންވަރަކާއިމެދު އެއްބަސްވެފައި އޮންނަ ޙާލަތެއްގައި، އެއްބަސްވެފައިވާ މިންވަރުގެ ބަދަލު ގެއްލުން ލިބޭ ފަރާތަށް ނަގައިދިނުމަކީ ދިވެހިރާއްޖޭގެ ކޯޓުތަކުން މީގެ ކުރިން ނިންމާފައިވާ ޤަޟިއްޔާތަކާއި ފުށުއަރާކަމެއްކަމުގައި ބެލެވެން ނެތެވެ. (ޕެރ. 3 (ހ))

2015/SC-A/16 ގައި ސުޕްރީމް ކޯޓުން ބަޔާންކުރާ ޙާލަތަކީ ދެފަރާތުގެ ދެމެދުގައި ކުރިން ވެވޭ އެއްބަސްވުމުގައި ޝަރުޠު ޖަޒާއީގެ ގޮތުގައި ފައިސާ ނަގައިދެވޭނެ މިންވަރަކާއިމެދު ކުރިއާލައި އެއްބަސްވެފައިނެތި ހަމައެކަނި ފޮނުވޭ އިންވޮއިސްގައި ވަކި ޢަދަދެއްގެ ޖޫރިމަނާ ފައިސާ ނެގޭނެކަމަށް ބަޔާންކުރާ ޙާލަތެވެ. ދެފަރާތުގެ ދެމެދުގައިވާ އެއްބަސްވުމެއްގައި ޝަރުޠު ޖަޒާއީގެ ގޮތުގައި ވަކި ޢަދަދެއްގެ ފައިސާ ނެގޭނެކަމަށް އެއްބަސްވެފައިވާނަމަ އެފަދައިން ޢަމަލުކުރަން ނުޖެހޭނެކަމަށް އެޤަޟިއްޔާގައި ކަނޑައަޅުއްވާފައިވާ އުޞޫލުތަކުގެ ތެރެއިން އެއްވެސް އުޞޫލެއްގައި ބަޔާންވެގެން ނުވެއެވެ. (ޕެރ. 3 (ރ))

2015/SC-A/16 ގައި ޖޫރިމަނާގެ ފައިސާ ނަގައިދީފައިނުވަނީ ޝަރުޠު ޖަޒާއީއާ ގުޅޭގޮތުން ކުރިން ވެފައިވާ އެއްބަސްވުމެއްނެތި ހަމައެކަނި ފޮނުވުނު އިންވޮއިސްގައި ޝަރުޠު ޖަޒާއީގެ ވާހަކަ ބަޔާންކުރުމުން އެ ފައިސާއާމެދު އަނެއް ފަރާތުން އެއްބަސްވެފައިނުވާތީއެވެ. އެފައިސާ ނަގައިދީފައިނުވަނީ ޖޫރިމަނާ ފައިސާގެ ގޮތުގައި ކަނޑައަޅާފައިވާ ޢަދަދު ބޮޑުވެގެން ނޫނެވެ. (ޕެރ. 3 (ރ))

ޝަރުޠު ޖަޒާއީގެ ގޮތުގައި ނެގޭނެ މިންވަރަކާއިމެދު ކުރިއާލައި ދެފަރާތުން އެއްބަސްވެފައިވާކަން ދެފަރާތުގެ ދެމެދުގައި ވެފައިވާ އެއްބަސްވުމަށް ބެލުމުން އެނގެން އޮތްނަމަ، 2015/SC-A/16 ގައި ބަޔާންކުރާ އުޞޫލުތައް އެމައްސަލައެއްގެ މައްޗަށް ތަޠުބީޤު ކުރާނެ ހަމައެއް ނެތެވެ. (ޕެރ. 3 (ބ))

އެއްބަސްވުމުގައި ބަޔާންކުރާ ގޮތުގެ މަތިން ޖޫރިމަނާގެ ފައިސާ ޖެހޭނީ އަސްލު ފައިސާ ދައްކާ ޚަލާޞްކުރި މުއްދަތާއި ހަމައަށް ކަމަށްވާއިރު، ދަށުކޯޓުން ޖޫރިމަނާގެ ފައިސާގެ ޢަދަދު ހިސާބުކޮށްފައިވަނީ ގޯސްކޮށްކަން އެނގެން އޮތްނަމަ، ޖޫރިމަނާގެ ގޮތުގައި ނަގައިދިނުމަށް ޙުކުމްކުރައްވާފައިވާ ފައިސާގެ ޢަދަދަށް ބަދަލު ގެންނަންޖެހޭނެއެވެ. (ޕެރ. 3 (ޅ))