ޖުމައިރާ މެނޭޖްމެންޓް ސަރވިސަސް މޯލްޑިވްސް ޕވޓ ލޓޑ ވ. އެސް ޕީ އެޗް ޕވޓ ލޓޑ

އާބިޓްރޭޝަނުގެ ޤާނޫނުގެ 45 ވަނަ މާއްދާގެ (ހ) ގެ ދަށުން، އާބިޓްރޭޝަނުގައި ހިނގަމުންދާ މައްސަލައަކާ ގުޅިގެން ވަގުތީ ފިޔަވަޅު އެޅުމުގެ ބާރު އާބިޓްރަލް ޓްރައިބިއުނަލަށް ލިބޭ ޙާލަތުތަކުގައި، އެ ނިސްބަތަށް އެ ބާރު ކޯޓަށްވެސް ލިބިގެންވެއެވެ؛ އާބިޓްރޭޝަން ހިނގަމުންދަނީ ރާއްޖެއިން ބޭރުގައި ކަމުގައިވިޔަސްމެއެވެ. (ޕެރ. 7، 12)

ކުރިން ހުށަހެޅި ވަގުތީ އަމުރުގެ މައްސަލައެއް، އެއަށް ބިނާކުރި އާބިޓްރޭޝަން ނިމުމުން އެދި ބާޠިލުކުރުމަށްފަހު، އެ ވާޤިޢާތަކާ ގުޅުންހުރި އައު އާބިޓްރޭޝަނެއްގެ މައްޗަށް އަލުން ވަގުތީ އަމުރަކަށް އެދުމަކީ ޢަދުލު އިންޞާފުގެ ނިޒާމުގެ ބޭނުން ނަހަމަގޮތުގައި ހިފުމެއް ނޫނެވެ. (ޕެރ. 6-7)

45 ވަނަ މާއްދާގެ (ށ) ގައިވާ ބައިނަލްއަޤްވާމީ އާބިޓްރޭޝަނާ ގުޅޭ އުޞޫލުތައް ކޯޓުން އަދި އެކުލަވާނުލުމަކީ އެ މާއްދާ ތަންފީޛުނުކޮށް، އޭގެ ބާރު ނެތިދާގޮތަށް ޢަމަލުކުރަންވީ ސަބަބެއް ނޫނެވެ؛ އެ މާއްދާގެ ދަށުން ވަގުތީ ޙައްލު ހޯދުމުގެ ޤާނޫނީ ޙައްޤު ފަރާތްތަކަށް ލިބެންޖެހެއެވެ. (ޕެރ. 9)

އާބިޓްރޭޝަން ފެށުނު ތާރީޚު ކަނޑައަޅަނީ ފަރާތްތައް އެއްބަސްވި އާބިޓްރޭޝަން ރޫލްސް (SIAC Rules 2016 ގެ 3.3) ގެ މަތިންނެވެ؛ ރަޖިސްޓްރާރަށް ފުރިހަމަ ނޯޓިސް އޮފް އާބިޓްރޭޝަން ލިބުމުން އާބިޓްރޭޝަން ހިނގަމުންދާ މައްސަލައަކަށް ވެއެވެ. (ޕެރ. 10)

ވިޔަފާރީގެ އެއްބަސްވުމެއްގައި ބޭރުގެ އާބިޓްރޭޝަން ސެންޓަރެއްގެ ރޫލްސްގެ ދަށުން މައްސަލަ ޙައްލުކުރުމަށް އެއްބަސްވުމަކީ ކޮންޓްރެކްޓާބެހޭ ޤާނޫނުގެ 18 ވަނަ މާއްދާގެ (ރ) ގެ ދަށުން ހުއްދަ ކަމެކެވެ؛ ބިދޭސީ ޤާނޫނެއް ތަޠްބީޤުކުރަން އެދޭ ފަރާތުން އެ ޤާނޫނުގައި ކަން އޮތްގޮތް ސާބިތުކުރުމުގެ ބުރަ އުފުލަންޖެހެއެވެ (ސުޕްރީމް ކޯޓުގެ 2017/SC-A/23). (ޕެރ. 14)

ވަގުތީ ޙިމާޔަތަކީ ކޯޓުތަކަށް މުޠްލަޤުކޮށް ލިބިފައިވާ ބާރެއް ނޫނެވެ؛ ވަގުތީ އަމުރެއް ނެރުމަށް ސުޕްރީމް ކޯޓުގެ 2012/SC-A/21 ގައިވާ ތިން ޝަރުޠު ފުރިހަމަވާން ޖެހެއެވެ: (ހ) ޙިމާޔަތް ލިބެންޖެހޭ މައުޟޫޢީ ޙައްޤެއް އޮތުމުގެ އިޙްތިމާލު ފާޅުކަން ބޮޑުގޮތެއްގައި ޤާއިމުވުން (fumus boni juris)، (ށ) ވަގުތީ އަމުރެއް ނެރުމަކާނުލައި މައުޟޫޢީ ދަޢުވާ ލަސްވުމުން ނުރައްކަލެއް ކުރިމަތިވުން (periculum in mora)، (ނ) އެދޭ ފަރާތަށް އެކަމަށް އެދުމުގެ ޞިފަތު/ޙައިޘިއްޔަތު ލިބިގެންވުން. (ޕެރ. 19-22، 27-29)

ބެލެންސް އޮފް ކޮންވީނިއަންސްގެ ޓެސްޓަކީ އާބިޓްރަލް ޓްރައިބިއުނަލުން ވަގުތީ ފިޔަވަޅު އެޅުމުގައި ބޭނުންކުރާ ޓެސްޓެއް ކަމުންނާއި ރާއްޖޭގެ މިންގަނޑުތަކާ ފުށުނާރާތީ، ކޯޓުން ނިންމަންވާނީ އެ ނިންމުން ފަހުން ގޯސްވެއްޖެނަމަ ލިބޭ ބޭއިންސާފު އެންމެ ކުޑަވާ ގޮތަށެވެ؛ ގެއްލުމުގެ ބަދަލު ދެއްކުމުގެ މާލީ ތަނަވަސްކަމާއި އެއްބަސްވުމުގެ ޒަމާންވީ ގުޅުން ފަދަ ކަންކަން ވަޒަންކުރެވެއެވެ. (ޕެރ. 18، 30)

ކޮންޓްރެކްޓެއް ރަނގަޅު ނިޔަތުގައި ތަންފީޛުކުރުމަކީ ޢަހުދަށް ވަފާތެރިވުމުގެ ޤާޢިދާއާއި pacta sunt servanda ގެ މަބްދައުގެ މަތިން ބައިވެރިންނަށް ލާޒިމް ކަމެކެވެ (ސުޕްރީމް ކޯޓުގެ 2017/SC-A/32)؛ ދިގު ޒަމާންވީ އެއްބަސްވުމެއް މަޝްވަރާއަކާނުލައި ބާޠިލުކޮށް 24 ގަޑިއިރުގެ ތެރޭގައި ތިންވަނަ ފަރާތަކާ އައު އެއްބަސްވުމެއް ހެދުމުން ރަނގަޅު ނިޔަތާމެދު ސުވާލު އުފެދި، ފުރަތަމަ ނަޒަރުގައި ޙިމާޔަތް ލިބެންޖެހޭ ޙައްޤެއް އޮތުމުގެ އިޙްތިމާލު ޤާއިމުވެއެވެ. (ޕެރ. 24، 27)