ސްޓޭޓް ބޭންކް އޮފް އިންޑިޔާ ވ. ޕްލެޓިނަމް ކެޕިޓަލް ހޯލްޑިންގްސް ޕްރައިވެޓް ލިމިޓެޑް

ނަތީޖާ: ނިންމުމުގެ ބައި ލިޔުމުގައި ނުހިމެނޭ (ފުރަތަމަ ނުކުތާ ޤަބޫލުނުކުރި)

ދަށު ކޯޓު: ސިވިލް ކޯޓު B2-CR1/VA/2021/02

ކޯޓުން ނިންމަން ޖެހުނު ސުވާލު

ރަހުނުކުރި ރިސޯޓް ވިއްކާލުމުގެ އިޢުލާނަށް ޢަމަލުކުރުން ފަސްކުރުމަށް ސިވިލް ކޯޓުން ނެރުނު ވަގުތީ އަމުރަކީ ބޭންކުގެ ޖަވާބަށް ރިޢާޔަތްނުކޮށް ފަނޑިޔާރުންގެ ޤާނޫނުގެ 5 (ހ) އާ ޚިލާފަށް ނެރުނު އަމުރެއްތޯ؛ އަދި އިސްޤާޟީ މައްސަލަ ބެއްލެވުމަކީ ސެކްޝަން ޙަވާލުކުރުމުގެ ޤަވާޢިދާ ޚިލާފު ބާޠިލު އިޖުރާއަތެއްތޯ.

ކަނޑައެޅި ޤާނޫނީ އުޞޫލުތައް

1. ކޯޓަށް ހުށަހެޅިފައިވާ މައްސަލައަކާ ގުޅިގެން ވަގުތީ އަމުރެއް ނުނެރެފިނަމަ ޙުކުމުގެ މަޤްޞަދު ޙާޞިލުނުވެ ހިނގައިދާނެ ކަމަށް ޤަބޫލުކުރެވޭ ސަބަބު ހުރިނަމަ، ނުވަތަ މައްސަލައިގައި ހިމެނޭ ފަރާތަކަށް ގެއްލުމެއް ލިބިދާނެ ކަމަށް ފެނިއްޖެނަމަ، ވަގުތީ އަމުރެއް ނެރުމުގެ ބާރު ފަނޑިޔާރަށް ލިބިގެންވެއެވެ. (ޕެރ. 7)
2. ވަގުތީ އަމުރު ނެރުމަކީ ކޯޓަށް ލިބިގެންވާ އިޚްތިޔާރީ ބާރެކެވެ. 2012/SC-A/21 ގައި ކަނޑައެޅިގެންވާ ގޮތުން ވަގުތީ އަމުރު ނެރުމުގައި ބަލަންޖެހޭ ތިން ޝަރުޠަކީ: (1) އެދޭ ފަރާތަށް ޤާނޫނީ ޙިމާޔަތް ލިބެންޖެހޭ މައުޟޫޢީ ޙައްޤެއް ނުވަތަ ޤާނޫނީ މަރުކަޒެއް އޮތުމުގެ އިޙުތިމާލު ފާޅުކަން ބޮޑުކަމުގައި ވުން؛ (2) ވަގުތީ އަމުރު ނުނެރެ އަޞްލު ދަޢުވާ ލަސްވެއްޖެނަމަ އިޢާދު ނުވަތަ ތަދާރުކު ނުކުރެވޭ ގެއްލުމެއްގެ ނުރައްކާ އޮތުން؛ (3) އެދޭ ފަރާތަށް އެފަދަ އަމުރަކަށް އެދުމުގެ ޞިފަ ނުވަތަ ހައިސިއްޔަތު ޤާނޫނީ ގޮތުން ލިބިފައިވުން. (ޕެރ. 8، 9)
3. ވަގުތީ އަމުރެއްގެ އިސްތިއުނާފެއްގައި، މައުޟޫޢީ ދަޢުވާގެ މައުޟޫޢާ ގުޅޭ ނުކުތާތަކާ މެދު (މިސާލަކަށް ރަހުނު ވިއްކުމުގައި ވަކި އިޖުރާއަތުތައް ފުރިހަމަކުރަން ޖެހޭތޯ) އެ މަރުޙަލާގައި ގޮތެއް ކަނޑައެޅިދާނެ ކަމަށް ނުދެކެއެވެ. (ޕެރ. 11)
4. ވަގުތީ އަމުރަކީ ދަޢުވާގެ މައުޟޫޢުގައި ނިޔާއެއް ކުރުމުގެ ކުރިން ފަރާތަކަށް ގެއްލުމެއް ލިބިދާނެ ކަމަށް ބެލެވޭ ކަމެއް ހުއްޓުވުމަށް ވަގުތީ ގޮތުން އަޅާ ފިޔަވަޅެކެވެ. އެފަދަ ފިޔަވަޅު މައްސަލައިގެ އަޑުއެހުމެއް ބޭއްވުމަކާ ނުލައިވެސް އެޅުމުގެ އިޚްތިޔާރު ފަނޑިޔާރަށް ލިބިގެންވާތީ، އެގޮތަށް ނެރުނު އަމުރަކީ ފަނޑިޔާރުންގެ ޤާނޫނުގެ 5 ވަނަ މާއްދާގެ (ހ) އާ ޚިލާފު އަމުރެއް ނޫނެވެ. (ޕެރ. 12)
5. ވަގުތީ އަމުރުގެ މައްސަލަތަކަކީ އޭގެ ޒާތުގައި އަވަސް ޙައްލެއް ހޯދަންޖެހޭ ބާވަތުގެ މައްސަލަތަކެވެ. (ޕެރ. 15)

ބަލާފައިވާ ޤާނޫނުތައް

• ޤާނޫނު ނަންބަރު 13/2010 (ދިވެހިރާއްޖޭގެ ފަނޑިޔާރުންގެ ޤާނޫނު) ގެ 5 ވަނަ މާއްދާގެ (ހ)
• ޝަރީޢަތްކުރުމާ ބެހޭގޮތުން ހެދިފައިވާ ޤަވާއިދުގެ 335 ވަނަ މާއްދާ (ސިވިލް ކޯޓުގެ އަމުރުގައި 295 ވަނަ މާއްދާ)
• 2012/SC-A/21 (ސުޕްރީމް ކޯޓު)