ފާޠިމަތު ޢަބްދުލްޣަފޫރު ވ. ޙަސަން ޝާކިރު މުޙައްމަދު އަދި މާލޭ ސިޓީ ކައުންސިލް

ނަތީޖާ: ވަގުތީ އަމުރުގެ ފާއިލިއްޔަތު ނިމިފައިވާތީ އިސްތިއުނާފު ކުރިއަށް ނުގެންދެވޭނެކަމަށް ނިންމި

ދަށު ކޯޓު: ސިވިލް ކޯޓު 114-B16/VA/2024/03

ކޯޓުން ނިންމަން ޖެހުނު ސުވާލު

ސިވިލް ކޯޓުގެ 2024-CVC-1858 ޤަޟިއްޔާގައި ނެރުނު ވަގުތީ އަމުރުގެ އިސްތިއުނާފު ހައިކޯޓުގައި ހިނގަމުންދަނިކޮށް މައުޟޫޢީ މައްސަލައިގައި ޣައިރު ޙާޟިރު ޙުކުމެއް ކޮށް ނިމުމުން، ވަގުތީ އަމުރުގެ ފާއިލިއްޔަތު ނިމިފައިވާ ޙާލަތުގައި އިސްތިއުނާފު ކުރިއަށް ގެންދަންޖެހޭތޯ؛ އަދި ބަނީ ހޯލްޑިންގްސް ޤަޟިއްޔާގެ އުޞޫލުން ޤާނޫނީ ނުކުތާއަކާ މެދު ގޮތެއް ކަނޑައަޅަންޖެހޭތޯ.

ކަނޑައެޅި ޤާނޫނީ އުޞޫލުތައް

1. މައުޟޫޢީ މައްސަލައިގައި ގޮތެއް ކަނޑައަޅަންދެން ނުވަތަ ކޯޓުން އެހެން ގޮތަކަށް އަންގަންދެން ނެރޭ ވަގުތީ އަމުރުގެ ފާއިލިއްޔަތު، މައުޟޫޢީ މައްސަލަ ނިމުމުން ނިމުމަކަށް އަންނާނެއެވެ؛ އެފަދަ ވަގުތީ ފިޔަވަޅެއްގެ އިސްތިއުނާފު، މައުޟޫޢީ މައްސަލައިގެ ތެރެއަށް ނުވަދެ ގޮތެއް ކަނޑައެޅޭނެ ޤާނޫނީ ބަޙުޘެއް ނެތްނަމަ ކުރިއަށް ގެންދެވޭނެ ތަނެއް ނެތެވެ.
2. ސުޕްރީމް ކޯޓުގެ ބަނީ ހޯލްޑިންގްސް ލިމިޓެޑް ވ. މޯލްޑިވްސް އިންލަންޑް ރެވެނިއު އޮތޯރިޓީ (2016/SC-A/25) ޤަޟިއްޔާގައިވާ ގޮތުން، މައްސަލައިގެ މަޙައްލު ގެއްލުނު ނަމަވެސް ކޯޓަށް ހުށަހެޅިފައިވާ ޤާނޫނީ ނުކުތާއަކާ މެދު ގޮތެއް ކަނޑައެޅުމަކީ ކޯޓުގެ ޒިންމާއެއް ނަމަވެސް، އެ އުޞޫލު ތަޠުބީޤުވަނީ މައުޟޫޢުގެ ތެރެއަށް ނުވަދެ ގޮތެއް ކަނޑައެޅޭނެ ޤާނޫނީ ސުވާލެއް އޮތްނަމައެވެ.
3. ބިމުގެ ގޯޅީގެ ވެރިފަރާތާއި ބާވަތާ މެދު ޚުޞޫމާތެއް އޮތް ޙާލަތެއްގައި، ޚުޞޫމާތު އުފެދުމުގެ ކުރިން އޮތް ޙާލަތު (ސްޓޭޓަސް ކޯ) މައްސަލަ ނިމެންދެން ދެމެހެއްޓުމަށް ނެރޭ ވަގުތީ އަމުރެއް، ކުރިން ކޮށްފައިވާ ޙުކުމަކާ ޚިލާފުތޯ ނުވަތަ ވަކި ފަރާތެއްގެ ޙައްޤު އޮތްގޮތް، މައުޟޫޢުގެ ތެރެއަށް ނުވަދެ ވަގުތީ އަމުރުގެ އިސްތިއުނާފެއްގައި ކަނޑައެޅިދާނެކަމަށް ނުދެކެއެވެ.
4. މައުޟޫޢީ ދަޢުވާއަކީ ސަރުކާރު އިދާރާއެއްގެ ފިޔަވަޅުތައް ބާޠިލުކުރުމާއި ގެއްލުމުގެ ބަދަލު ހޯދުމަށް ކުރާ ދަޢުވާއެއް ކަމުގައިވާއިރު، ސްޓޭޓަސް ކޯ ދެމެހެއްޓުމުގެ ވަގުތީ އަމުރުން ދެވޭ ފަރުވާއަކީ މައުޟޫޢީ ފަރުވާއާ އެއްގޮތް ފަރުވާއެއް ނޫނެވެ.

ބަލާފައިވާ ޤާނޫނުތައް

• ދިވެހިރާއްޖޭގެ ސުޕްރީމް ކޯޓުގެ 2016/SC-A/25 (ބަނީ ހޯލްޑިންގްސް ލިމިޓެޑް ވ. މޯލްޑިވްސް އިންލަންޑް ރެވެނިއު އޮތޯރިޓީ)
• ދިވެހިރާއްޖޭގެ ސުޕްރީމް ކޯޓުގެ 2022/SC-A/79 (ހައިކޯޓުގައި ހުށަހެޅުނު ވަގުތީ އަމުރުގެ އެދުމާ މެދު ގޮތެއް ނުނިންމައި އިސްތިއުނާފު އަވަހަށް ނިންމުމުގައި ފުޓްނޯޓުގައި ރެފަރކޮށްފައި)