ދަ މޮރިޝަސް ކޮމަރޝަލް ބޭންކް (މޯލްޑިވްސް) ޕވޓ ލޓޑ ވ. ޝަރޫ ލޯންޗް ސަރވިސަސް ޕވޓ ލޓޑ

ޤާނޫނު ނަންބަރު 78/81 ގެ 2 ވަނަ މާއްދާގައި ޤަޟިއްޔާއެއްގައި ދަޢުވާ ކުރާ ފަރާތުން ދަޢުވާ ދޫކޮށްލައިފިނަމަ، އަލުން އެދަޢުވާއެއް ނުއުފުލޭނެކަމަށް ބަޔާންކޮށްފައިވީނަމަވެސް، ދަޢުވާ ބާޠިލްކޮށްފައިވަނީ ދަޢުވާކުރާ ފަރާތުން ދަޢުވާ އިސްލާޙްކޮށް އަލުން ހުށަހެޅުމަށްޓަކައި އެދިފައިވާތީ ދަޢުވާ އިސްލާޙްކޮށްގެން އަލުން ހުށަހަޅައިފިނަމަ ބެލޭގޮތަށްކަމަށް ވާނަމަ، އެ މައްސަލަ ބެލުމުގެ އިޚްތިޞާޞް ކޯޓަށް ލިބިގެންވެއެވެ. (ޕެރ. 4 (ށ))

ޗެކް ދޫކުރެވެނީ ޤާނޫނީ ރިކުއަރމެންޓަކަށްޓަކައި ނުވަތަ ޗެކްގައިވާ ޢަދަދަށް ފައިސާ އަދާކުރުން ކަށަވަރުކޮށްދޭ ހަރުދަނާ ހެއްކެއްގެ ގޮތުގައެވެ. ޗެކްގައި ބަޔާންކޮށްފައިވާ ތާރީޚްގައި އެޗެކުން ފައިސާ ލިބެންވާ ފަރާތަށް ޗެކްގައިވާ އަދަދަށް ފައިސާ ލިބުން ޙައްޤުވާނެއެވެ. ޗެކެއް ދޫކުރުމުގައި ޗެކް ދޫކުރާ ފަރާތުގެ މަސްއޫލިއްޔަތަކީ އެ ޗެކްގައިވާ ޢަދަދަށް އަމިއްލަ އެކައުންޓްގައި ފައިސާ ހުރިކަން ކަށަވަރުކޮށްދިނުމެވެ. އެކައުންޓުގައި ޗެކްގައި ބުނެފައިވާ ޢަދަދަށް ފައިސާ ނެތުމަކީ ޗެކް ބައުންސްވުމާއި ޗެކާ ގުޅިގެން އުފުލަންޖެހޭ ޒިންމާއާ ޚިލާފުވުމެވެ. (ޕެރ. 4 (ރ))

ޤާނޫނީ ގޮތުން ޝަކުލިއްޔާތު ފުރިހަމަކޮށް މީހެއްގެ އަމިއްލަ އިޚްތިޔާރުން ޗެކް ދޫކޮށްފިނަމަ، އެޗެކްގައި ފައިސާ ލިބެންވާ ފަރާތްކަމަށް ލިޔެފައިވާ ފަރާތަށް އެ ޗެކްގައިވާ ފައިސާ ލިބިދިނުމަކީ ޗެކް ދޫކުރި ފަރާތުގެ ޤާނޫނީ މަސްއޫލިއްޔަތެކެވެ. ޤާނޫނީ ޝަކުލިއްޔަތު ފުރިހަމަކޮށް ދޫކުރެވޭ ޗެކަކީ، އެޗެކްގައިވާ ފައިސާ އެޗެކް ދޫކުރެވޭ ފަރާތަށް ލިބުމަށްޓަކައި އިތުރު އެހެން ވާޤިޢާއެއް ޤާނޫނީ ގޮތުން ޘާބިތުކުރުން ލާޒިމުނުވާގޮތުން، އޭގެ ޒާތުގައިވެސް ޗެކުގައިވާ ޢަދަދަށް ފައިސާ އަދާކުރުން ކަށަވަރުކޮށްދޭ ހަރުދަނާ ހެއްކެކެވެ. (ޕެރ. 4 (ރ))

ޗެކް ދޫކުރާ ފަރާތުގެ ރުހުމާއި ޤަބޫލުގައި ޗެކެއްގައި ފައިސާގެ ޢަދަދު ޖަހައި ސޮއިކޮށް، ޤާނޫނީ ގޮތުން ޗެކެއްގައި ފުރިހަމަކުރަންޖެހޭ ހުރިހާ ޢުންޞުރުތަކެއް ފުރިހަމަކުރުމަށްފަހު ޗެކް ދޫކޮށްފިނަމަ، ޗެކް ދޫކުރާ ފަރާތުން އެޗެކް އެ ދޫކުރަނީ އެޗެކްގައިވާ ފައިސާ އެޗެކް ދޫކުރެވުނު ފަރާތަށް އިތުރު އެއްވެސް ޝަރުޠަކާ ނުލައި ލިބިދިނުމުގެ އިލްތިޒާމް ފުރިހަމައަށް އަދާކުރާނެ ކަމުގެ ޔަޤީންކަމުގައެވެ. (ޕެރ. 4 (ރ))

ބޭންކް ގެރެންޓީ ދޭންވާނީ އެ ގެރެންޓީ ދިނުމުގެ ކުރިން ބޭންކުން ކަށަވަރުކުރަންޖެހޭ އިދާރީ އިޖުރާއާތުގެ ތެރެއިން ވަކި ޚާއްޞަ ކަންތައްތަކެއް ކަށަވަރުކުރުމަށްފަހުގައެވެ. ޗެކެއްގައި ގެރެންޓީ ތައްގަނޑު ޖެހުމަށްފަހު އެޗެކަކީ، އެޗެކެއް ދޫކުރާ ބޭންކަކުން ވަކިކަމަކަށް ކަށަވަރުކޮށްދޭ ގެރެންޓީ ލިޔުމަކާއި އެއްފަދަ އެއްޗެކެވެ. (ޕެރ. 4 (ކ))

ބައިނަލްއަޤްވާމީ ކޮމާޝަލް މިންގަނޑުތަކުން ބެލިކަމުގައިވިއަސް، މިފަދަ ޙާލަތްތަކުގައި ގެރެންޓީ ދޭ ފަރާތަކީ ބޭންކެވެ. ދެވޭ ގެރެންޓީއަކީ އޭގައި ހިމެނޭ ޝަރުޠުތައް ބަދަލުނުކުރެވޭ ގޮތަށް ބޭންކް ގެރެންޓީ ލިބިގަންނަ ފަރާތާއި ބޭންކާ ދެމެދު ބަންދެވިގެންދާ އެއްބަސްވުމެއް އުފަންވެގެންދިއުމެވެ. ބޭންކް ގެރެންޓީ ތައްގަނޑު ޖެހުމަށްފަހު ޗެކުގެ ވެރިފަރާތަށް އެޗެކް އިޝޫކޮށްފިނަމަ، އެއީ ލިޔުމުން ދެވޭ ބޭންކް ގެރެންޓީއެކެވެ. އެއީ އެޗެކުގައިވާ ބޭންކް ގެރެންޓީގެ މައްޗަށް ބޭންކު ބަންދެވިގެންދާ ޤާނޫނީ އިލްތިޒާމްތަކެއް އުފަންވެފައިވާ އެއްބަސްވުމެއް އޮތް ޗެކެކެވެ. (ޕެރ. 4 (ބ)، (ކ))

ޖިނާއީ މައްސަލަތައް ނުނިމެނީސް، އެފަދަ މައްސަލައެއްގައި ހުށަހެޅިފައިވާ ހެއްކާއި ޤަރީނާތައް މަދަނީ މައްސަލަތަކުގައި ހުށަހެޅޭނީ ވަކި އުޞޫލަކުންކަމަށް ބަޔާންކޮށްފައިވާ ސުޕްރީމް ކޯޓުގެ ޤަޟިއްޔާތަކުގައި ފަރާތަކީ ސީދާ ޖިނާއީ މައްސަލައެއްގެ ތުހުމަތު ކުރެވުނު ފަރާތެއްކަމުން، މަދަނީ ޤަޟިއްޔާގެ ފަރާތްތަކަކީ އެ ޤަޟިއްޔާއާ ގުޅިގެން ޖިނާއީ ތުހުމަތެއް ކުރެވޭ ނުވަތަ ޖިނާއީ ތަޙްޤީޤެއް އެ ފަރާތެއްގެ މައްޗަށް ކުރެވޭ ނުވަތަ ކުރެވިފައިވާ ފަރާތްތަކަކަށް ނުވާނަމަ، އެ ޤަޟިއްޔާތައް ތަޠްބީޤުކުރަން ޖެހޭކަމަށް ބަލަންޖެހޭ ސަބަބެއް އޮތްކަމަށް ނުފެނެއެވެ. (ޕެރ. 4 (އ))

ޗެކެއްގައިވާ އަދަދަށް ފައިސާ ދިނުމުގެ ގެރެންޓީ ބޭންކުގެ ފަރާތުން ނަގާފައިވާނަމަ، ޗެކް ދޫކުރި ފަރާތުގެ ހައިސިއްޔަތުން ފައިސާ ލިބިދިނުމުގެ ޒިންމާ، ޗެކް ދޫކުރި ފަރާތާއެކު ތަޟާމުނީ (jointly) ކޮށް އަދި ވަކިވަކީން ފަރުދީ (severally) ކޮށް، ޗެކަށް ފައިސާ ލިބިދެވޭނޭކަމުގެ ގެރެންޓީ ދީފައިވާ ފަރާތުގެ ހައިސިއްޔަތުން ބޭންކުން ޒިންމާވާންޖެހޭނެއެވެ. (ޕެރ. 4 (ވ))