ފިއުލް ސަޕްލައިސް މޯލްޑިވްސް ޕވޓ ލޓޑ ވ. މުޙައްމަދު ޖިނާޙް މަންޞޫރު

ނަތީޖާ: ދަށުކޯޓުގެ ޙުކުމް ބާޠިލު (އިޖުރާއީ ޢަދުލުވެރިކަން ޤާއިމުނުވާކަމަށް ކަނޑައެޅި ބައާއި 24,600ރ ބަދަލު ބާޠިލު)

ކީވޯޑުތައް: ވަޒީފާއާބެހޭ، ވަޒީފާއިން ވަކިކުރުން، ޤާނޫނު ނަންބަރު 2/2008، ވަޒީފާއާބެހޭ ޤާނޫނު، ވަޒީފާއާބެހޭ ޤާނޫނުގެ 23 ވަނަ މާއްދާ، އިޖުރާއީ ޢަދުލުވެރިކަން، ނޯޓިހާނުލާ ވަކިކުރުން، ފަހު އިންޒާރު، އިދާރީ ތަހުޤީޤު

ދަށު ކޯޓު: ވަޒީފާއާބެހޭ ޓްރައިބިއުނަލް 132/VTR/2020

ކޯޓުން ނިންމަން ޖެހުނު ސުވާލު

ފަހު އިންޒާރު ދީފައިވާ މުވައްޒަފަކު ވަޒީފާއާބެހޭ ޤާނޫނުގެ 23 ވަނަ މާއްދާގެ ދަށުން ނޯޓިހާނުލާ ވަކިކުރުމުގައި، އިދާރީ ތަޙުޤީޤެއްގައި ބަޔާން ނެގުމަށްފަހު ތަޙުޤީޤުގެ ނިންމުންތަކަށް ޖަވާބުދާރީވުމަށް އިތުރު ފުރުޞަތެއް ނުދިނުމުން އިޖުރާއީ ޢަދުލުވެރިކަން ޤާއިމުނުވާކަމަށް ވަޒީފާއާބެހޭ ޓްރައިބިއުނަލުން ކަނޑައެޅީ ރަނގަޅަށްތޯ.

ޚުލާޞާ

ވާޤިޢާ: ބާޖު ކެޕްޓަނެއްގެ ގޮތުގައި ހުރި މުވައްޒަފު ދުއްވި ބާޖު ކުންފުނީގެ އެހެން ބާޖެއްގައި ޖެހިގެން، އިދާރީ ގޮތުން ބަޔާންނަގައި ބެލުމަށްފަހު ވަޒީފާއާބެހޭ ޤާނޫނުގެ 23 ވަނަ މާއްދާގެ ދަށުން ނޯޓިހާނުލާ ވަކިކޮށްފައިވެއެވެ. ހާދިސާ ހިނގީ މުވައްޒަފަށް ފަހު އިންޒާރު ދިނުމަށްފަހުއެވެ.

ދަށު ކޯޓުގެ ނިންމުން: މައުޟޫޢީ ޢަދުލުވެރިކަން ޤާއިމުވެފައިވާނަމަވެސް، ތަޙުޤީޤަށްފަހު ހޯދުނު ކަންކަމަށް ޖަވާބުދާރީވުމުގެ ފުރުޞަތު ނުދީ ވަކިކުރީތީ އިޖުރާއީ ޢަދުލުވެރިކަން ޤާއިމުނުވާކަމަށް ކަނޑައަޅައި، 87 (ށ) ގެ ދަށުން 2 މަހުގެ މުސާރައާއި އިނާޔަތް (24,600ރ) ބަދަލުގެ ގޮތުގައި ދިނުމަށް ޓްރައިބިއުނަލުން ނިންމިއެވެ.

ޚަޞްމުންގެ ހުށަހެޅުންތައް: ކުންފުނިން ބުނީ ތުހުމަތު ސާފުކޮށްދީ ބަޔާން ނަގައި ޖަވާބުދާރީވުމުގެ ފުރުޞަތު ދީފައިވާތީ މަދަނީ މިންގަނޑުން އިޖުރާއީ ޢަދުލުވެރިކަން ޤާއިމުވެފައިވާ ކަމަށެވެ. މުވައްޒަފު ބުނީ އެކްސިޑެންޓަކީ ފުލުހުން ތަޙުޤީޤުކުރަންޖެހޭ ކަމެއްކަމަށާއި ވަކިކުރީ ޤާނޫނާ ޚިލާފަށް ކަމަށެވެ.

ކޯޓުގެ ސަބަބުތައް: ފަހު އިންޒާރު ދީފައިވާ މުވައްޒަފެއްގެ ތުހުމަތު ސާފުކޮށްދީ ބަޔާން ނަގައި ބަސްބުނުމުގެ ފުރުޞަތު ދީފައިވާއިރު، ތަޙުޤީޤު ރިޕޯޓެއް ތައްޔާރުކޮށް އިތުރު ފުރުޞަތެއް ދޭން ޖެހޭނެ ޤާނޫނީ ހަމައެއް ނެތީތީ އިޖުރާއީ ޢަދުލުވެރިކަން ޤާއިމުވެފައިވާކަމަށް ކަނޑައެޅިއެވެ.

ކަނޑައެޅި ޤާނޫނީ އުޞޫލުތައް

1. ވަޒީފާއާބެހޭ ޤާނޫނުގައިވާ ގޮތުގެމަތިން މުވައްޒަފަކު ވަޒީފާއިން ވަކިކުރެވޭނީ މައުޟޫޢީ ޢަދުލުވެރިކަމާއި އިޖުރާއީ ޢަދުލުވެރިކަން ޤާއިމުކުރުމަށްފަހުއެވެ. (ޕެރ. 36)
2. ދަށުކޯޓު ނުވަތަ ޓްރައިބިއުނަލުން މައުޟޫޢީ ޢަދުލުވެރިކަން ޤާއިމުވެފައިވާކަމަށް ކަނޑައަޅާފައިވާ ބައި މުވައްޒަފު އިސްތިއުނާފު ނުކޮށްފިނަމަ، ވަޒީފާދޭ ފަރާތުން ކުރާ އިސްތިއުނާފެއްގެ ތެރެއިން އެ މައްސަލައާމެދު ޤާނޫނީ ބަހުސެއް ކުރިއަށް ގެންދެވޭނެ ހަމައެއް ނެތެވެ؛ އިސްތިއުނާފުގެ ދާއިރާ ގައިދުވަނީ އިސްތިއުނާފުކުރި ނުކުތާއަށެވެ. (ޕެރ. 33، 37)
3. ވަޒީފާއާބެހޭ މައްސަލަތަކުގައި އިޖުރާއީ ޢަދުލުވެރިކަން ޤާއިމުވެފައިވޭތޯ ކަނޑައެޅުމުގައި ޢާއްމު އުޞޫލުތަކުގެ އިތުރުން ކޮންމެ މައްސަލައެއްގެ ޚާއްޞަ ސިފަތަކަށް ރިޢާޔަތްކުރަންޖެހެއެވެ؛ ވަކިކުރުމަށް މެދުވެރިވި މައުޟޫޢީ ސަބަބާމެދު ގޮތެއް ކަނޑައެޅުމުގެ ވަސީލަތަކާ ގުޅުންހުރި އިޖުރާއަތުތައް ފުރިހަމަވެފައިވާ މިންވަރު ވަޒަންކުރަންޖެހެއެވެ. (ޕެރ. 39، 44)
4. ނޯޓިހާނުލާ ވަކިކުރާ މައްސަލަތަކުގައި ޖަވާބުދާރީވުމުގެ ފުރުޞަތު ބިނާވަނީ ވަކިކުރެވޭ ޙާލަތާއި ވަގުތާއި ތުހުމަތުގެ ޠަބީޢަތަށް ބަލައިގެންނެވެ؛ ލިޔުމުން ޖަވާބުދާރީވުމުގެ ފުރުޞަތު ނުދެވުނަސް ތުހުމަތު ސާފުކޮށްދީ ސުވާލުކުރެވިދާނެއެވެ؛ ތަޙުޤީޤެއް ހިންގާފައިވޭތޯ ބަލަނީ މަދަނީ މިންގަނޑުން ކަމަށާއި ރިޕޯޓެއް އޮތުމަކީ ތަޙުޤީޤު ހިންގިކަން ބެލުމުގެ ހަމައެކަނި ވަސީލަތް ނޫނެވެ. (ޕެރ. 41، 43، 44)
5. ފަހު އިންޒާރު ދީފައިވާ މުވައްޒަފަކީ މަސައްކަތުގެ އަޚުލާޤު އެކަށީގެން ނުވުމުގެ ސަބަބުން ވަޒީފާއާބެހޭ ޤާނޫނުގެ 23 ވަނަ މާއްދާގެ ދަށުން ނޯޓިހާނުލާ ވަކިކުރެވިދާނެ މުވައްޒަފެކެވެ؛ މިފަދަ މައްސަލަތަކުގައި ވަކިކުރުމުގެ ކުރިން ޖިނާއީ ތަޙުޤީޤެއް ހިންގުން ލާޒިމުވާކަމަށް ބެލެވޭނެ ޤާނޫނީ ނުވަތަ ޝަރުޢީ ހަމައެއް ނެތެވެ. (ޕެރ. 45)
6. ތުހުމަތުކުރެވޭ ޢަމަލުތައް ސާފުކޮށްދީ، މުވައްޒަފުގެ ބަޔާންނަގައި، އިދާރީ ތަޙުޤީޤެއްގެ ތެރެއިން ބަސްބުނުމުގެ ފުރުޞަތު ދީފައިވާނަމަ، ވަކިކުރުމުގެ ކުރިން ތަޙުޤީޤު ފުރިހަމަކޮށް ވަކި ރިޕޯޓެއް ތައްޔާރުކުރުމާއި، ތަޙުޤީޤުގެ ނިންމުންތަކަށް ޖަވާބުދާރީވާން އިތުރު ފުރުޞަތެއް ދިނުން ލާޒިމުވާކަމަށް ބެލެވޭނެ ޤާނޫނީ ހަމައެއް ނެތެވެ؛ އެ ޙާލަތުގައި އިޖުރާއީ ޢަދުލުވެރިކަން ޤާއިމުވެފައިވާނެއެވެ. (ޕެރ. 45، 47)

ބަލާފައިވާ ޤާނޫނުތައް

• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 23 ވަނަ މާއްދާ
• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 87 ވަނަ މާއްދާގެ (ށ)
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާ
• 2011/HC-A/134 (މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ޕަބްލިކް ލިމިޓެޑް ވ. އަޙްމަދު މުޙައްމަދު)
• 2017/SC-A/44 (ސަންލޭންޑް ޓްރެވަލް ލިމިޓެޑް ވ. އަންޖަލީން މޭރީ ނާޒިއާ)
• 2014/SC-A/27، 2014/SC-A/30 (އިސްމާޢީލް މަސްޢޫދު ވ. ހައުސިންގ ޑިވެލޮޕްމަންޓް ފައިނޭންސް ކޯޕަރޭޝަން ލިމިޓެޑް)
• 2018/SC-A/49 (މޯލްޑިވްސް އެއަރޕޯޓްސް ކޮމްޕެނީ ލިމިޓެޑް ވ. ޖާބިރު ޢަބްދުއްރަޙްމާން)
• 2019/SC-A/23 (މުޙައްމަދު ނާޝިދު ވ. ސިވިލް ސަރވިސް ކޮމިޝަން)
• 2021/SC-A/20 (ޤާސިމް މޫސާ ވ. ސިވިލް ސަރވިސް ކޮމިޝަން)
• 2021/HC-A/221 (ޗަމްޕާ ބްރަދާރސް މޯލްޑިވްސް ޕްރައިވެޓް ލިމިޓެޑް ވ. ޝަހީދާ އިސްމާޢީލް)
• 2021/HC-A/323 (ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑް ވ. އަޙްމަދު އަސްލަމް)